Facebookimi allataq peqqutaalluni ukiuni 15-ni suliffigisamit soraarsitaasoq
Danmarkimi suliffeqarfimmi Vestasimi immikkoortortaqarfiit ilaanni pisortaq soraarsinneqarpoq unnukkut sulisussaagaluarluni internetsernini pissutigalugu
Vestasimi suleqataasoq suliffimmini ukiuni 15-ni atorfeqareerluni ingerlaannartumik soraarsinneqarpoq. Unnukkut sulisussaagaluarluni internetsersimanini, kiisalu Facebookimi allassimanini, pissutigalugit soraarsinneqarpoq.
Vestre Landsretip taamatut soraarsitsineq akueraa, ingerlaannartumilli soraarsitaanera isumaqatiginagu, taamaattumik suliffeqarfik soraarsitaasumut 117.000 koruuninik taarsigassarsitinneqarpoq.
Vestas Blademi Lemimi sulisoq 1999-mi immikkoortortaqarfiit ilaanni pisortatut atorfinitsinneqarpoq. Ingerlatsinermi ajutoortoqassappat sulisussatut atorfeqarluni.
Unnuarsiortussaalluni sulinermini fabrikki pingasoriarluni ajortoqarnersoq misissuiffigaa. Iliuutsit nutaat aamma atuarpai.
Suliffimmukartilluni politiinit unitsinneqarsimavoq sukkavallaarnini pissutigalugu. Suliffimmini unikkallarnermini pisoq Facebookimi allappaa. Sulinermi nalaani mailinik allappoq kiisalu illunik aamma nittartakkakkut misissuilluni.
Sulereernermi kingorna aqaguani naalakkaminit aggersarneqarpoq ataatsimiigiaqquneqarluni. Akunnerni marlunni internetsersimanera paasineqarpoq, tamannalu Vestasimi inatsisinik unioqqutitsinerulluni.
Suliaminit unitsinneqarpoq soraarsinneqarlunilu.
Vestre Landsretimi iliuuserineqartoq ingasagineqarpoq.
Soraarsitaasup Vestasip inatsisai nalunngikkai oqaatigineqarpoq, inatsisigineqartunillu qaangiisimalluni.
Taamaattumik soraarsitaanera ajunngilaq.
Kisiannili Vestasip inatsisaani allaqqasoqanngilaq taamatut paasisaagaanni qanoq kinguneqartitsisoqassanersoq.
Ukiuni kingullerni 15-ni sulinerani maalaartoqarsimanngilaq sulisarneranut atatillugu.