Facebook atuisartunik uukapaatitsisimasutut saassunneqarpoq

Facebook-imik atuisartut quppernerminnut iseraangata inuit naapittarfiat nutaarsiassanik arlalinnik, atuisartunut ataasiakkaanut soqutiginarsinnaasunik, siunnersuuteqarajuttarpoq.
2012-imili Facebook sapaatip akunnera ataaseq suli ingerlariaqqissimavoq nutaarsiassanik, atuisartut 700.000-t aallartittarfianni saqqummersartunik, uukapaatitsilluni.
Taamatut allappoq nutaarsiassaqartitsivik AFP, taassumalu innersuussutigaa isertuussamik Facebook-imik misissuisimaneq, arfininngormat amerikarmiut tusagassiorfiini tamanut saqqummiunneqartoq.
Atuisartut aallartittarfianni nutaarsiassat assigiinngitsut inissinneqartarnerat inuit naapittarfiata allanngorartittarsimavai - takuniarlugu pissusilersornermikkut qanoq qisuariarfigissaneraat.
AFP naapertorlugu misissuisut paaserusussimavaat atuisartut nutaarsiassanik, ajortunik pitsaasunillu, annertunerusumik pilersorneqalerunik isumaginnerusumik isumalunnerusumilluunniit allattalertarnersut.
Isertuussamik misissuisimanerup tamanut saqqummiunneqarnerata kingorna inuit naapittarfianni allami, Twitter-imi, atuisartut arlallit sakkortuumik qisuariarput.
Arlallit Facebook-ip misileraasimanera taavaat ´isumakulunnartorujussuartut´ aamma ´amiilaarnartutut ajorluinnartutullu´, AFP allappoq.
Facebook-ip isertuussamik misissuinerata takutissimavaa atuisartut aallartiffimminni uukapaatinneqarnerminnik sunnerneqartartut, tassa isumagissaarnerullutik isumalunnerullutilluunniit allattalersimagamik, nutaarsiassat suuneri apeqqutaallutik.