EU: Kalaallit Nunaat 164 milliuunit koruuninik pinngitsoorsinnaasoq

EU-mit tapiissutitut siunnersuutigineqartut aningaasat naleerukkiartornerannut nalimmassarneqarsimanngillat. Tamanna isumaqarpoq, Kalaallit Nunaat 2021-imiit 2027 ilanngullugu katillugit 164 milliuunit koruuninik pinngitsoorsinnaasoq.

EU-p ataatsimiititaliarsuaata aningaasat naleerukkiartornerat 1,7 milliaardit koruunini, 2021-imiit 2027 ilanngullugu Kalaallit Nunaannut tapiissutissatut siunnersuumminni ilanngullugu naatsorsuussimanngilaat. Tamanna isumaqarpoq tapiissut ukiuni tullerni tunniunneqartarnerani aningaasat naleerukkiartornerat malillugu annikilliartussasoq. Kalaallit Nunaat 164 milliuunit koruuninik annaasaqassaaq.

Nunanut allanut tunngasunut Naalakkersuisup, Ane Lone Baggerip, Sofia Geislerip paragraf 37 atorlugu apeqquteqaataanut akissutaani tamanna atuarneqarsinnaavoq.

Isumaqatiginninniarnerit ingerlapput

EU-p ataatsimiititaliarsuata aningaasat naleerukkiartornerat naatsorsuussimannginneranut arlallit peqqutaasinnaapput, Ane Lone Bagger allappoq. Taama aalajangernerami suna peqqutaarpiarnersoq avammut nalunaarutigineqanngilaq, akissummili Brexit peqqutaasinnaasut ilaattut taaneqarpoq.

EU-mit aningaasassat pillugit isumaqatiginninniarnerit suli uninngillat. Taamaammat allatut ittumik suli isumaqatigiissusiortoqarsinnaavoq, tapiissutissarlu aamma allatut aningaasartalerneqarsinnaalluni.

Powered by Labrador CMS