Sermersooq
EU-mit Sermersuumut aningaasaliissutit suliffeqarfinnut atorniarai
EU-p nutaaliornermik suliniutitut aningaasaliissutigisimasaat kommuneqarfiit pingaarnersaanni suliffeqarfiisa qinnuteqarfigisinnaalerpaat
Kommuneqarfik Sermersuup Danmarkip Avannaani EU-p allaffeqarfianut ilaasortaanera aqqutigalugu kommunit pingaarnersaanni suliffeqarfinni inerisaanerup suliffeqartitsinerullu iluini siuarsaanissamut aningaasanik pissarsiniartoqassaaq. Kommuneqarfik Sermersooq nittartakkamini paasissutissiivoq.
Kommuneqarfik Sermersooq Danmarkip Avannaani EU-p allaffeqarfianut ilaasortanngorneranit ukiup ataatsip missaa qaangiuppoq.
Atuaruk: Sermersooq EU-mi allaffimmut ilanngunniarpoq
Nutaaliornermik suliniutinut aningaasaliissutit
Kattuffik Jyllandip avannaani kommuninit 11-nnit aamma Region Nordjyllandimit pilersinneqarpoq EU-millu aningaasaliisoqarneratigut nutaaliornikkut suliniutinut atugassat pillugit attaveqaateqarnissamut aningaasaliinissaannut ikiuuttarlutik. Danmarkip Avannaani EU-p allaffeqarfia Jyllandip avannaani Støvringimiippoq aamma Belgiami Bruxellesimiippoq.
Kommuneqarfiit pingaarnersaasa paasissutissiaraa, Danmarkip Avannaani EU-p allaffeqarfiata suleqatigineqarnera Kommuneqarfik Sermersuumi Ineriartortitsinermut Piujuartitsinermullu Allatseqarfimmit isumagineqartoq. Kommunip ilaasortaaffigilermaguli ataatsimut iliuusissatut pilersaarut suliarineqarpoq, Danmarkip Avannaanilu EU-p allaffeqarfia siullermik Kommuneqarfik Sermersuumut tikeraarluni 2016-imi novembarip qaammataani.
- Ilaasortaanikkut nutaaliorluni suliniutinut aningaasaliissuteqartoqarneranik periarfissaqarneq pillugu Nuummi inuussutissarsiuteqartut annertuumik soqutiginninnerat Ineriartortitsinermut Piujuartitsinermullu Allatseqarfimmit nalunaarutigineqarpoq. EU-mit aningaasanik qinnuteqarnermi piumasaqaaterpassuit najukkami suliffeqarfinnit nukissaqarfigineqarniarneri ajornakusoortuusut Allatseqarfimmit nalilerneqarpoq. Taamaammat Ineriartortitsinermut Piujuartitsinermullu Allatseqarfimmi siunnersortit inuussutissarsiutinik ingerlataqartunut ikiuutissapput, Kommuneqarfik Sermersooq nalunaaruteqarpoq.
Aalborgimi Kalaallit Nunaannut ulloqartitsinermi Danmarkip Avannaani EU-p allaffeqarfiani pisortaq Benjamin Holst Kommuneqarfik Sermersuumit aallartitanut saqqummiivoq.
Aamma atuaruk: Aalborgimi Kalaallit Ullui