EU-p kalaallit soqutigisaat Brexitimi isumaqatiginninniarnermi neriorsuutiginianngilaat
Vivian Motzfeldtip kalaallit soqutigisaat naluginiaqquniarlugit EU-p Brexitimut isumaqatiginninniarnermut pisortaa ataatsimeeqatigaa
Tuluit Nunaata EU aappaagu marsimi qimappagu, Kalaallit Nunaannut akisusinnaavoq.
Tassami Tuluit Nunaat tassaavoq Europami nuna Kalaallit Nunaata raajanik uutitikkanik qalipaajakkanillu annerpaamik tunisaqarfigisartagaa.
Tamanna ajornerpaamik pisoqarpat Kalaallit Nunaata raajanik akileraarusigaanngitsunik avammut tunisarisartagaanit tamarmiusunit ukiumut 3 milliarder koruunit missaanniittunit koruunit milliardip affai angullugit amerlassuseqartunik annaasaqarneranik kinguneqarsinnaavoq. Tamatuma qaavatigut Kalaallit Nunaanni raajaleriffinnik marlunnik matusinermut atatillugu suliffissanik 300-nik annaasaqartoqarsinnaavoq.
Tamakku ajornartorsiutit maluginiaqquniarlugit, nunanut allanut naalakkersuisup, Vivian Motzfeldtip (S) EU-p Brexitimut isumaqatiginninniarnermi pisortaa, Michel Barnier ataatsimeeqatigeqqammerpaa.
- Tuluit Nunaat EU-mut ilaasortaajunnaarpat aammalu Tuluit Nunaata EU-p niuernikkut isumaqatigiissutaanit anissagaluarpat kalaallit aalisakkanik tunisassiaat siunissami Tuluit Nunaannut eqqunneqarnerminni eqqussinermi akitsuutinik aammalu inuussutissanik misissuinermi nalaanneqartalissapput, Vivian Motzfeldt tusagassiuutinut nalunaarummi allappoq.
- Taama pisoqassagaluarpat, Kalaallit Nunaanni suliffeqarfiit pingaarnertut annertuumik eqqorneqarsinnaapput. Kalaallimmi kinguppaannik saarullinnillu tunisassiaat akileraaruserneqannginnerini akii apparneqartariaqartalissammata.
Naak ajornartorsiut paasineqarsineqaraluartoq, Michel Barnier neriorsuuteqarnianngilaq.
- Taamaattumik Tuluit Nunaat EU-p niuernikkut isumaqatigiissutaanit anissagaluarpat Kalaallit Nunaata maanna niuernikkut ingerlaa-riaasaa attatiinnarneqarnissaa Naalakkersuisup soqutigisaraa. Tamanna tunngavigalugu Naalakkersuisoq EU-p isumaqatiginninniarnera Kalaallit Nunaannut annertuumik sunniuteqarsinnaanera eqqaamaniarneqarumaartoq neriuutigaa. Tamatumunnga Michel Barnier soqutiginnilluarluni paasinnilluarpoq, tusagassiuutinut nalunaarummi oqaatigineqarpoq.