EU
EU-p Canadallu niuernermut isumaqatigiinninniarnerat unittoorpoq
Belgiami naalagaaffeqatigiinni ilaasup isumaqatigiinninniut, CETA, Kalaallit Nunaannut sunniuteqartussaq akuersaanngilaa
EU-p Canadallu niunermik killilersugaanngitsumik isumaqatiginninniarnera CETA-mik taaguuteqartoq unittoorpoq. Tamanna akuersissutigineqassappat Belgiami naalagaaffeqatigiit tamarmik akuerseqqaartussaapput, naalagaaffeqataasulli Vallonienip akuerseqataajumanngilaq.
Canada pakatsivoq
Naak EU-mit akuerseqqusaagaluarlutik isumaqatiginninniarnerillu valloniap inatsisartoqarfiani ulloq unnuarlu ingerlanneqaraluartut suli isumaqatigiittoqanngilaq.
EU-milu ilaasortanit, nunani 28-iusunit, Belgien kisiartaalluni akuersaanngilaq.
- Maannangaaq EU nunat assigiinngitsut akornanni isumaqatigiissusiorsinnaanngitsoq uannut Canadamullu paasinarsivoq. Naak nuna isumaqatiginninniarfiusoq EU-p naleqartitaanut pingaartitsisuugaluartoq, Chrystia Freeland oqarpoq.
- Canada pakatsivoq. Uangami inuttut aamma pakatsingaatsiarpunga, Chrystia Freeland oqarpoq.
Misileeqqissapput
EU-li suli tunniutiinnanngilaq. EU-p parlamentiani siulittaasup Martin Schulzip Chrystia Freeland isumaqatiginninniarnerit attatiinnarniarlugit ullumi ataatsimeeqatigissavaa.
Kalaallit Nunaannut sunniutaa
Naak Vallonskit akerliugaluartut isumaqatigiissutissamik nassaartoqassappat Nunatsinnut sunniuteqassaaq. Canadami EU-mut aalisakkanik tunisassiorsinnaanngussaaq taamaasilluni Nunatsinnit tunisassiat sunnerneqaratarsinnaanngussallutik.
Isumaqatigiissut CETA ukiut marluk matuma siorna piareerneqarpoq taannalu Bruxellesimi EU-p Canadallu naalakkersuisuunerisa ataatsimeeqatigiinnerini pilersaarut malillugu sisamanngorpat atsioqatigiissutigineqartussaagaluarpoq.
/ritzau/