EU nunatsinnut aningaasaliissuteqalertoq

EU nunatsinnut aningaasaliissuteqalerpoq.

Naalakkersuisut Siulittaasuat Kim Kielsenip aamma nunat tamalaat akornanni suleqatigiinneq ineriartortitsinerlu pillugit Europami Kommissæri Neven Mimicallu EU-p Nunatsinnut aningaasanik tunissuteqartarnissaanut tunngasut pillugit isumaqatigiissut atsioqatigiissutigaat.

Isumaqatigiissut ullumi, sisamanngornermi, Nuummi atsiorneqarpoq.

235 mio koruunit

- Kalaallit Nunaata aningaasarsiornerata innuttaasullu atugarissaarnerisa assigiinngiiaartuunissaanut qulakkeerinninniarnermi ilinniagaqarneq assassornermillu ilinniagaqarneq pingaaruteqarluinnarput. 235 millioner koruuninik (31,6 millioner Euro) tapersiinitsigut Kalaallit Nunaanni innuttaasut ilinniagaqassusaannik qaffassaanissamut piginnaasaqarnerusunillu sulisiqalernissamut erseqqissunik angusaqarnissamut ikiuutissaagut, Europami Kommissæri Neven Mimica, Namminersorlutik Oqartussat tusagassiuutinut nalunaarutaanni taama oqarpoq.

Atsioqatigiinnerput suleqatigiilluarnitsinnut ersiutaavoq, Kim Kielsen oqarpoq.

- Atsioqatigiinneq Naalakkersuisut EU-mik suleqatigiinnermik pingaartitsinerannik takussutissaavoq, suleqatigiinnerullu ingerlaannarnissaa kissaatigalutigu tamanna meerartatta inuusuttortattalu ilinniagaqarnissaannut annertuumik iluaqutaammat, Kim Kielsen oqarpoq.

Neven Mimicap sisamanngornermi Ilisimartusarfimmi ilinniartut naapissimavai.

Tallimanngonermi taanna Ilulissiassaaq tassani meeqqat atuarfissaat, Perorsaanermik Ilinniarfik, Royal Greenlandillu aalisakkerivia takusassavai Ilulissallu Kangiani angallammik angalaassalluni, Namminersorlutik Oqartussat paasissutissiipput.