EU Nunatsinni taama aalisagartassaqartigaaq

Aappaagu EUmeersut Nunatta imartaani raajartassaat saattuartassaallu ikilissapput. Illuanilli EU-meersut qaleralittassaat amerlissapput. EU-meersut 2014-mi Nunatta imartaani pisassaat pillugit Nunarput EU-lu taama isumaqatigiissuteqarput.

Kalaallit Nunaat aamma EU Nunatta 1985-mi EF-mi ilaasortaajunnaarnerata kingorn aalisarneq pillugu isumaqatigiissuteqartarput 300 millioner koruunit sinnerlugit Nunatsinnut isertitsissutaasartumik. EUp akiliuteqarnermigut aalisakkanik assigiinngitsunik pisassat pissarsiarisarpai ukiualuillu allortarlugit isumaqatigiinniutigineqartarput.

Naalakkersuisut akuersissapput
Maanna EUp 2014-mi pisassai inissipput imatut amerlassuseqassallutik:

EU-p Tunumi raajartarsat 1.000 tonsinik ikilisitat pissarsiarai, tassa EU 2014-imi 6.500 tonsinik raajartassaqalerpoq.

Taakkua saniatigut EU-p saattuartassai 50 tonsinik ikilineqarput, tassa EU saattuanik 200 tonsit angullugit annertussusilinnik aalisarsinnaavoq.

Taarsiullugu EU Tunumi qaleralittassami qaavigisigut 150 tonsinik tunineqarpoq, tassa EU Tunumi 4.465 tonsit angullugit qaleralinniarsinnaavoq.

Piffissamili tamatumani EU ammassanniarnissamut neqeroorummik tigusisinnaanngilaq, taakkunanngali aalisarsinnaaneq 2014-imi upernaakkut tullissaanik ataatsimiinnermi oqaluuserineqassaaq.

Isumaqatigiinniarnerit atorfilittatigoortumik ingerlapput isumaqatigiissullu Naalakkersuisuni EUmilu inaarutaasumik akuerineqaqqaartussaavoq.

- Kalaallit Nunaata EU-llu 2014-imi aalisarnikkut attaveqaqatigiinnissaq pillugu isumaqati-ginninniarnerat ulluni 27.-29. november 2013 Bruxellesimi atorfilittanit ingerlanneqarput, isumaqatiginninniartunullu tamanut naammaginartumik isumaqatigiissuteqarlutik, Nunarput sinnerlugu isumaqatigiinniartut nalunaarput.