EU-mut ilaasortaanissaq Demokraatit misissorniarpaat

Inatsisartut aqagu ataatsimiilerpata, Kalaallit Nunaata EU-mut ilaasortanngorsinnaaneranik Naalakkersuisut misissueqqullugit Demokraatit aalajangiiffissatut siunnersuuteqarput.

Maanna nunatut imarsuup akianiittutut inissisimalluni isumaqatigiissuteqarnermut taarsiullugu ilaasortanngornissamut pitsaaqutit ajoqutillu Naalakkersuisut misissussagaat, Justus Hansenip (D) siunnersuutigaa.

- Apeqqullu pingaaruteqarluinnartoq tassaavoq, ilumut EU-mut attaveqarneq ullumikkut iluaqusiinersoq immaqaluunniit ajoqutaaginnarnersoq?, Justus Hansen aperivoq.

- Uatsinnut iluaqutaassanerluni tamakkiisumik ilaasortanngoqqikkutta? Ilaasortanngoqqinneq sunik kinguneqassavamita, nangilluni aperivoq.

Ilaasortanngornissaq isumaliuutersuutigigaa
Taamatut misissuinerup Kalaallit Nunaata EU-mut ilaasortanngorsinnaaneranut aalajangiinissamut tunngaviliisuussasoq, Demokraatit isumaqarput.

Aalajangiiffissatut siunnersuut Naalakkersuisunit tigulluarneqanngilaq.

- Kalaallit Nunaat EU-mi ilaasortaalernissamik angusaqarniarsarissasoq Naalakkersuisut politikkikkut anguniagarinngilaat, nunanut allanut naalakkersuisoq, Vittus Qujaukitsoq (S) akissuteqarnermini allappoq.

Taamatut misissuisitsineq aningaasanik asuli atuinerussasoq taassuma erseqqissaatigaa. Vittus Qujaukitsup aamma Tuluit Nunaata EU-mit aninerata tunngaviusumik pissutsinik allannguisinnaanera aamma oqaatigaa. Taamaammallu maanna misissuinissaq atorfissaqanngitsutut nalilerpaa.