EU-mik suleqateqarneq
EU-mik suleqatigiinnissamik isumaqatigiissuteqartoqarnera Kim Kielsenimit nuannaarutigineqarpoq
Naalakkersuisut Siulittaasuata Kim Kielsenip Kalaallit Nunaata, Danmarkip aamma EU kommissionip suleqatigiinnissaannik Ataatsimoorluni tamanut nalunaarut atsiorpaa
EU-p, Danmarkip Kalaallit Nunaatalu suleqatigiinnissamik isumaqatigiissutaat atsiorneqaqqammerpoq.
Persuarsiualaartoqarpoq EU-p allaffeqarfissuani, Berlaymontip illorsuani Bruxellesimiittumi. Tassani kommissionip siulittaasuata Jean Claude Junckerip Naalakkersuisut Siulittaasuat Kim Kielsen aamma statsminister Helle Thorning Schmidt persuarsiualaarnissamut qaaqquai ukiorpassuarni siunissami suleqatigiinnissaminnik isumaqatigiissuteqarnertik malunnartinniarlugu.
- Suleqatigiinneq Kalaallit Nunaata aningaasaqarnerminik ineriartortitsinissaanut iluaqutaassaaq Europamiut suleqatigisani qanittumik suleqatigisinnaallugit, atsioqatigiittut ilisimatitsipput.
Kim Kielsen tulluusimaarpoq
Suleqatigiinnermut aallaaviuvoq Kalaallit Nunaata 1985-imi Unionimit aninera, tassani Illuatungeriit isumaqatigiillutik qanittumik attaveqartarnerit ingerlaannassasut kalaallillu inuiaqatigiit nappanneqarsinnaasumik aningaasaqarnikkut ineriartortinneqarnerannut iluaqutissanngorlugit ineriartortinneqassasut.
Ataatsimoorluni tamanut nalunaarummi erseqqissarneqarpoq Naalakkersuisut aamma Danskit Naalakkersuisui naligiillutik peqataasut taamaammallu taamatut naligiinnissamik tunngaveqarluni suleqatigiinnissaq tunngavigalugu EU-mut isumaqatigiissutinut tunngavissami Kalaallit Nunaata atsioqataanissaa qulakkeerneqartoq.
Naalakkersuisut Siulittaasuat persuarsiualaarnermi ilaatigut ima oqarpoq:
- Naammagisimaarluinnarpara Kalaallit Nunaat EU-lu isumaqatigiissutitigut attaveqarnitsinni aaqqiisinnaasimagatta taakkulu siunissami ukiorpassuarni attanneqarsinnaasumik ineriartornissatsinnut iluaqutaanissaat qulakkeersimagatsigu. Kalaallit Nunaata EU-mut naalakkersuinikkut isummersortarnerani pingaarnertut eqqarsaataajuaannarsimavoq isumatuunik kingunissaqarluartunillu isumaqatigiissuteqartarnerup qulakkeerneqarnissaa, oqaluttuarisaanitsinni pissutsinik ersersitsinerinnaanngitsunik kisiannili aammattaaq peqatigiilluta maannakkut pissutsinik siunissamut eqqarsaqatigiinnissatsinnik takutitsisunik.
Assigiinngitsutigut ikiuineq
Taamatuttaaq Naalakkersuisut Siulittaasuat erseqqissarpaa EU-p puisinik sanaanit tunisineq pillugu malittarisassaq naligiissarnera tamanut naammaginarnissaa, tusagassiutinut nalunaarummi allaqqasoqarpoq.
Suleqatigiinnermili aamma allatigut ikiuisoqassaaq. Aatsitassarsiornikkut, ilinniartitaanikkut, ilisimatusarnikkut allatigullu siunissami suleqatigiittoqassaaq.
Kalaallit Nunaata EU-mik suleqateqarneranik atsioqatigiinnerup 2007-meersoq sisamanngornermi isumaqatigiissutigineqartoq nutarterineruvoq.