invitation

EU Islandimut: Suli tikilluaqqusaavusi

EU-p kommissioniani siulittaasoq oqarpoq EU-p matua Islandimut ammasoq - sukkasuumilli qulaajaasoqaqquvaa

Islandip naalakkersuisuisa nutaat EU-mik ilaasortanngorniarnermut isumaqatigiinniarnerit sukkasuumik unitsikkallaraluaraat, EU-p kommissioniani siulittaasoq José Manuel Barosso marlunngormat oqarpoq EU-p matuni Islandimut ammatikkallaraa.
Barosso-lli aamma islandip ministeriunera Sigmundur David Gunnlaugsson tikeraareerlugu marlunngormat tusagassiortunik katersortitsinermi erseqqissarpaa, pitsaanerpaassasoq EU-p Islandillu siunissami attaveqarnissaasa sukkasuumik qulaajarneqarnissaa.
– Nunat EU-mut ilaasortat isumaqatigiillutik ilaasortanngornissamut isumaqatigiinniarnerit ammarnissaannik aalajangernerat suli atuuppoq. Islandip kissaatigippagu suli piumassuseqarpugut ilaasortanngornissamut isumaqatigiinniarnerit nanginnissaannut, qularutiginngilaralu Islandip immikkut soqutigisai isumagineqarsinnaasut.
– Ilaasortanngorniarnerup ingerlarnga pillugu islandip naalakkersuisuisa aalajangernerat kommissionip ataqqivaa. Islandip ilaasortanngorniarluni qinnuteqaataata ukiaru inatsisartuni nassuiaateqareernikkut atuunerata qulaajarneqarnissaa qilanaaraarput.
– Pingaaruteqarpoq aalajangerneq peqqissaartumik, kinaassusersiunngitsumik, takussaasumik pimoorussisumillu eqqarsaatersornermik tunuliaqutaqarluni pissasoq. Ataatsimulli aamma soqutigisaraarput aalajangerneq suli kinguartitseqqinnani pissasoq, Barosso oqarpoq.
Aamma atuaruk: Islandip konsuuleqarfissaa uaniissaaq
Islandip ministeriunera Bruxellesimut tikissaaq ersarissumik nalunaarutissaqarani islandimut EU-mut atatillugu aamma EU-mik suleqateqarnerup ineriartortinnissaa pillugu, qaqugu taasitinneqassanersut.
– Suliassaq parlamentimi oqaluuserereerutsigu takussavarput tassanngaanniit qanoq ingerlaqqissanerluta. EU-p Islandillu ukiuni qulikkaani qanimut suleqatigiissimanertik ineriartorteqqikkusuppaat.
– Tamatumani periarfissarpassuit takuavut - Issittoq ilanngullugu, avatangiisitigut aningaasarsiornikkullu.
– Pitsaasumik attaveqarnitta attatiinnarnissaa pingaarutilittut isigaarput. Attaveqarnerli ineriartortinneqartuassaaq. Tamanna qanoq pissanersoq ukiap kingorna takujumaarparput, Gunnlaugsson oqarpoq.
Upernaaq Islandimi qinersisoqarmat partiit talerperliit marluk ajugaapput. EU-mik ilaasortanngornissamut isumaqatigiinniarnernik unitsitsigallarnerat siusinnerusukkut naalakkersuisuusimasut poltiikkiannik muminnerulluinnarpoq.

Powered by Labrador CMS