Aalisarneq
EU immikkut 300 tonsinik saarullittassinneqarpoq
Kalaallit Nunaata EU-llu 2018-imut aalisarneq pillugu isumaqatigiissuteqarnerisigut Aalisarnermut aamma Piniarnermut Naalakkersuisoqarfiup EU-mik ukiumoortumik isumaqatiginninniarneq naammassivaa.
EU-p nunatta kangiani saarullittassai 300 tonsinik immikkut amerlineqarput, taamaalilluni saarullittassai katillugit 2.100 tonsiulerlutik.
Namminersorlutik Oqartussat tusagassiuutinut nalunaaruteqarput, paasissutissiaraalu, Kalaallit Nunaata EU-llu 2018-imut aalisarneq pillugu isumaqatigiissuteqarnerisigut Aalisarnermut aamma Piniarnermut Naalakkersuisoqarfiup EU-mik ukiumoortumik isumaqatiginninniarneq naammassivaa.
Kalaallit Nunaata EU-llu 2018-imut aalisarnikkut attaveqaqatigiinnissaq pillugu isumaqatiginninniarnerat Bruxellesimi atorfilittanit novembarip 27-annit 29-annut 2017-imi ingerlanneqarput.
- Isumaqatigiissut europamiut aalisartut 2018-imi nunatta imartaani aalisarnissaannut tunngaviliivoq. Isumaqatigiissutip tunngavigaa Aalisarneq pillugu 2016-imit 2020-mut isumaqatigiissut ilaliussaq Kalaallit Nunaata EU-llu akornanni illuatungeeriilluni aalisarneq pillugu isumaqatigiissummut ilaasoq, Namminersorlutik Oqartussat tusagassiuutinut nalunaaruteqarput.
Aalisakkat allat
Taakkua saniatigut EU suluppaagartassai 1.054 tonsinik ikilineqarput, siunnersuinermi suluppaakkat itisoormiut ikerinnarsiortullu ikilisimanerat tunngaviulluni. EU-p nunatta kangiani raajartassai 1.350 tonsinik ikinnerussapput, pisarisuukkat aamma 376 tonsinik ikilineqarput, ilanngullugu paasissutissiarineqarpoq.
Ammassannut tunngatillugu EU 16.016 tonsinik neqeroorfigineqarpoq, taakkulu pisassanit aallaaviusuniit 3.984 tonsinik ikinnerupput. Taakku pisassat 2018-imi allanngortinneqarsinnaapput biologit siunnersuinerat nutarterneqarpat.
Naalakkersuisunit akuerineqartusssaq
Kalaallit Nunaata EU-llu akornanni aalisarneq pillugu isumaqatigiissut ilaatigut akiliuteqarnikkut aalisarneq pillugu isumaqatigiissutaavoq ilaatigullu aalisarnermi peqatigiinnissamik isumaqatigiissutaalluni. Akiliuteqarluni aalisarnissami nunatta imartaani EU-p aalisagartassaqartinneqarnera pineqarpoq, peqatigiinnissamillu isumaqatigiissummi nunatta aalisarnikkut ineriartortinneqarnissaanut tapiissuteqarnissaq pineqarluni.
- Isumaqatigiissut isumaqatigiissuteqartunit naleqartinneqartorujussuuvoq, EU-millu isumaqatigiissutaasoq inaarutaasumik akuerisassanngorlugu Aalisarnermut aamma Piniarnermut Naalakkersuisumut kingusinnerusukkut saqqummiunneqassaaq, tusagassiuutinut nalunaarummi oqaatigineqarpoq.