- Ernerpit inerilluinnalersup atisani nammineq errorsinnaavai?

Paniit aavaqatigisarpiuk? Ajunngila Pavia napparsimasunik paasisunngorniarmat Ninallu takorloormagu siunissami sanasunngornissani? Ernerpit inerilluinnalersup atisani nammineq errorsinnaavai najallu tilluukkiartarpa?

Taama aperivoq Kalaallit Nunaanni Naligiissitaanermut Siunnersuisoqatigiit aqagu Nunatsinni naligiissitaanerup ulluanut atatillugu.

Meeqqanik perorsaariaatsip naligiissitaanermut isumaa Kalaallit Nunaanni Naligiissitaanissamut Siunnersuisoqatigiit ukiormanna immikkut samminiarpaat.

- Naak timip sananeqaataa apeqqutaajunnaariartoraluartoq taamaattoq ileqqutoqqat kulturilu sunniutilerujussuupput ilinniarniakkamik toqqaanermi, illumi suliassat agguataarnerini sunngiffimmilu soqutigisanik aallussinermi, siunnersuisoqatigiit siulittaasuat Anda Poulsen tusagasiuutinut nalunaarummi allappoq.

Taassuma tikkuarpaa, angutit arlaqanngitsut peqqissaasunngorniarlutillu perorsaasunngorniartartut, taamatullu arnat sanasunngorniarlutillu maskinmesterinngorniartarnerat.

Naligiissitaanermut Siunnersuisoqatiit isumaqarput, assigiinngissutsimut tunngavik perorsaariaatsimiittoq.

- Niviarsiaqqat amerlanngillat piniariaqataasartut, nukappiaqqallu amerlanngillat eqqiaatinneqartartut nerisassiortitaasartullu. Ilumut taamaappa? Immaqa tamanna isummiussaannaavoq, misissuisoqangaarsimanngilarmi, Anda Poulsen allappoq.

Tamanna ilaatigut pissaaq arfininngornermi 20. maj, Naligiissitaanerup Ulluani. Siunnersuisoqatigiit Aantuukasimmi (Nuuk Center) ullormi tassani aaqqissuussinermi peqataassapput, aaqqissuussisuuvorlu Isumaginninnermut, Ilaqutariinnermut, Naligiissitaanissamut Inatsisinillu atuutsitsinermut Naalakkersuisoq Sara Olsvig.

Aqagu Nuuk Centerimi nal. 11.00-mit 14.00-mut tamanna pillugu aaqqissuisoqassaaq, tassani Isumaginninnermut, Ilaqutariinnermut, Naligiissitaanissamut Inatsisinillu atuutsitsinermut Naalakkersuisoq Sara Olsvig peqataassaaq.