assit takukkit
Erinarsoqatigiit Iqalunneereerlutik: Iluatsilluaqaaq
Angutit erinarsoqatigiit ´Qissiat´ nunanut tamalaanut angalanertik siulleq naammagisimaarluinnarpaat
Angutit erinarsoqatigiit ´Qissiat´ ataasinngornermi septembarip 8-anni nunani tamalaani angalanertik siulleq aallartikkamikkuli ulapissimaqaat misigisaqarsimaqalutillu.
Pingasunngormat erinarsoqatigiit utoqqaat illuanni najugalinnut tusarnaartitsipput kalaallit erinarsuutitoqaannik, juullisiummik naggasiillutik. Ulloq taanna erinarsoqatigiit aamma pulaarpaat atualernissamut piareersarfik, allakkerivik, inatsisartut ataatsimiittarfiat, oaatsinik ilinniarfik aamma pisiniarfeqarfiussuaq. tassani erinarsorlutik aliikkusersuillutik.
Sisamanngormat ulloq angalanermi pingaarnerpaamik pisoqarfiuvoq. Ulloq taanna erinarsoqatigiit Laasaloosie Ishulutak, Etulu Aningiuq aamma Joshua Qaumariaq peqatigalugit aliikkuersuipput. Unnukkut High School Inughsuk-mi aaqqissuussineq ulikkaavippoq, tusarnaarianik erinisuttunik. Erinarsoqatigiit Qissiat tusarnaartitsilluaqaat malunnaqaarlu tusarnaarianit alutorineqaqisut.
Unnuk pingasunut avinneqarsimavoq. Siullermik kalaallit erinarsuutitoqaannik atuipput. Aappassaanik Qassiat-band peqatigalugit kalaallit nipilersugaat atorneqarput tusarnaartunit nuannarineqarluartumik. Pingajussaanillu nipilersuutaannaat atorlugit.
Naammagisimaarinnilluarput
Erinarsoqatigiit siulittaasuata Emile Mølgaardip angalaneq, tusarnaartitsinerlu, iluatsilluartorujussuartut oqaatigai. Taanna malillugu angalaneq sutigut tamatigut iluatsilluarsimavoq - peqataasunut tamanut misigisaqarfiulluarluni isumassarsinarluarlunilu.
Aqutsisup Tietken Jakobsenip angalaneq aamma naammagisimaarluarpaa, oqarlunilu angalaneq iluatsilluarsimasoq - erinarsoqatigiit angusaat naammagisimaarluinnarpai.