erinarsoqatigiit
Erinarsoqatigiit Aavaat inuusunnerulertut
Nukiit nutaat inuusunnerillu Aavaat siulersuisuinut ilaasortanngorput
Kalaallit Erinarsoqatigiit Aavaat arfininngornermi Kalaallit Illutaanni Københavnimi ataatsimeersuarput.
Inuusuttut marluk Aavaat siulersuisuinut ilaasortanngorneranni siulersuini ilaasortat malunnaatilimmik inuusunnerulerput.
Siulersuisuni siulittaasutut ingerlaqqittup Carsten Siegstadip ukiut qulingiluassaanik erinarsoqatigiinni nuannarineqarluartuni siuttooqqittussap tamanna nuannaarutigaa.
- Erinarsoqatigiit arlallit suminngaanneersuungaluarunilluunniit inuusuttunik ilaasortaqarnissaq ajornartorsiutigisarpaat. Erinarsoqatigiinnik suliaqarneq inuusuttunit 'utoqqarpalungineqartarpoq', taamaammat ukioq manna inuusuttut marluk peqatigiiffiup siulersuisuini suleqataalernerat nuannaarutissaavoq, Carsten Siegstad tusagassiuutinut nalunaarummi allappoq.
24-nik ukiulik Dorthe Kielsen Poulsen 25-nillu ukiulik Aannguaq René J. Hansen allatsitut siulittaasulli tulliatut qinerneqarput.
Ukiup ingerlanerani erinarsoqatigiit ineriartortinneqarnerinut siunissamilu suliassanut taakku pingaaruteqassasut, Carsten Siegstad naliliivoq.
Ineriartornermut pingaarutilik
Dorthe Kielsen Poulsen Qaqortuminngaanneerpoq, inuusukkaluaqalunilu ukiuni arfinilinni Avaakkunni peqataasimavoq. Taanna illussanik titartaanermik nunalerinerinermillu Kongelige Danske Kunstakademimi ilinniagaqarpoq.
Aannguaq Renè J. Hansen Aasianninngaanneerpoq, Københavnimulli nuunnginnermini ukiuni qulingiluani Aasiaat Nipaat peqataaffigisimavai, taanna peqatigiiffinni assigiinngitsuni siulersuisunut ilaasortaasarsimavoq arlalitsigulli siulittaasuusimalluni.
Aamma atuaruk: Atuakkiortunut nersornaasiineranni Aavaat erinarsortut
- Kalaallit inuusuttut Københavnip eqqaani 250-it sinnerlugit ilinniagaqartut nalunngilara, ilamininnguili erinarsoqatigisinnaalissagaluarutsigilli angusarujussuussaaq. Ilinniartut ataasiakkaat ikattulluunniit sapaatip akunneranut akunnialunni ilagaluta nuannarisarpaat, uagulli taakku aamma nuannaarutigisaqaagut. Uanga erinarsoqatigiinni peqataaneq peqqinnartutut isigaara, taamaammat najukkami kalaallit ilinniartut kattuffiat AVALAK saaffigisimavarput inuusuttut amerlanerit Aavaakkunni peqataalersinniarlugit, Carsten Siegstad oqarpoq.
Aamma atuaruk: Aavaat Christiansborgimi erinarsussapput
Siulersuisut nutaat ima isikkoqarput:
Siulittaasoq: Carsten Siegstad
Siulittaasup tullia: Aannguaq René J. Hansen
Aningaaserisoq: Frederik Lynge
Allatsi: Dorthe Kielsen Poulsen
Siulersuisunut ilaasortaq: Birgitte Mølgård Nielsen