isikkamik arsaanneq
Eriksen pingasoriarluni isertitsinerup VM-imullu anngunnerup kingorna: Tunneq ajulerpunga
Christian Eriksen, Irlandimi 5-1-mik ajugaanermi pingasunik isertitaqarluni, VM-imimut anngunniunnerit ingerlanneqarnerini aqqanileraarpoq, tamanna Danmarkip aasamut Ruslandimi VM-ertoqarnissamut, anngussutigaa.
Danmarkip isikkamik arsaallutik nunanut allanut unammisartuisa Irlandi 5-1-mik ajugaaffigalugu isikkamillu arsaalluni VM-imut peqataanissaq qulakkeerneqareersorlu Christian Eriksen nuanngaangaaqaluni apeqqarissaarfigitinnissamut sassarpoq.
Tottenham-imi unammisartoq playoff-imik unamminerup aappaani hattrickerpoq, taamaasilluni Danmarkip Irlandi Københavnimi siullermik unamminermi 0-0-ereersimallutik ataatsimut katinnerini 5-1-mik ajugaaffigaa.
- Taama pisoqareersoq tunniarneq ajornakusoorpoq. Ilimasunneq misigissutsillu qaammaterpassuarni initussapput, Christian Eriksen Kanal 5-imut oqarpoq.
Irlandip minutsit arlaqanngitsut qaangiuttut 1-0-mut isertitsinerisigut, Danmarkip unammineq aallartinnerliorpaa.
Irlandimiut siuarlutik isertitsissutigineqartoq Danmarkip tupaallaatigisimanngikkaa, Christian Eriksenip oqaatigaa, unammisartoqartigiimmi qanorluunniit pisoqaraluarpat Dublinimi isertitsiumaarlutik misigissuseralugu arsaakkiarsimapput.
- Kinguarnitsinni ilisimavarput sukataarnerusariaqarluta, isertitsinissarpulli ilimagiinnarsimavarput.
- Kusanartumillu "AC"-p (Andreas Christensen aaqq.) isertitsineratigut- immitsinnut tatiginerulerlutalu eqqissisimanerulersimavugut. Kinguninnguarlu nammineerlunga isertikkakku soorunami nuannaarneq misigissusaavoq, danskeq 2-1-mut isertitani pillugu oqarpoq.
Christian Eriksen pingasunik isertitsinermigut VM-imut anngunniulluni unamminerni aqqaneq-marlunni aqqanilinnik isertitaqalerpoq.
Danmarki gruppe E-mi Polen-imut tulliulluni aappaattut inissippoq, kingornalu danskit VM-imut peqaataanissaq qulakkeerniarlugu Irland playoff-ini unammisariaqalersimallugu.