angallannermut isumaqatigiissutit
Erik Jensen : Uggornaqaaq borgmesteri tusagassiutit aqqutigalugit attaveqatigiinneq ingerlanniarmagu.
Kommuninut, Nunaqarfinnut, Isorliunerusunut, Attaveqaqatigiinnermut Ineqarnermulluu naalakkersuisup eqqumiigaa borgmester Kiista P. Isaksenip inunnik angallassinerup misissorneqarnerata inerneri ataatsimiittarnerminni apeqqutigissarsimanngimmagit, tamannami pillugu Naalakkersuisoq nassuiaatissaqarluarmat.
Kommune Kujallermi Borgmesteri Kiista P.Isaksen (S) naalakkersuisumut paasiniaalluni anngussivoq, tassa inunnik kujtaani angallassineq pillugu misissuinerit inernerinik paasisaqarusulluni naalakkersuisumut saaffiginnimmat. Junimilimi Kommunit tusarniaanermut akissuteqaqqusaasimapput.
- Maanna qaammatit tallimanngulerput ilaasunik angallassineq pillugu kiffartuussinermut isumaqatigiissut pillugu ukiup affakkaartumik kommunip nalilersuinera tunniukkatsiguli, taamaakkaluartorli Naalakkersuisut tungaannit utertitsiffigineqanngilagut tusarniaanermi akissutitsinni pissutsit iluarsineqartariaqartutut taakkartukkagut tunngavigalugit iluarsiissutissanik imalimmik. Kiista P Isaksen (S) allappoq.
Ataatsimiinnerit akulikitsut
Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu naalakkersuisup Erik Jensenip eqqumiigaa sooq Kiista P.Isaksen tusagassiutinut saaffiginnimmat naalakkersuisoq toqqarlugu saaffiginagu.
- Sisamat tallimariarlunga ataatsimeeqatigisarsimavara ataatsimiinnerni nalunaarusiaq pillugu apeqquteqarnikuunngilaq. Erik Jensen (S) Sermitsiaq.AG-mut allappoq.
- Isumaqarpunga taamatut isornartorsiuineq uggornartoq .
Naalakkersuisummi nassuiaanissani amaffigilluinnaraluarpaa, aammalu peqqutissaqavissumik nalunaarusiaq akissuteqarfiginissaa kinguartittariaqarsimallugu.
Tassaarsuaqarnerata kingornna akissutissarput kinguartittariaqarsimavarput.
Kommunit tamarmik 13.juni inuttaasunik angallassinermut tusarnianermut akissuteqaqquneqarput, ullulli sisamat kingorna avannaa tassaarsuarmit eqqugaavoq. Tamassumalu kinguneraa Qaasuitsup Kommunia piffissaq sivisooq allanik suliaqartariaqarsimammat, nalunaarusiarlu kinguartikkallartariaqarlugu.
- Paasinarluinnarpoq nukiit tassaarsuaqarneranut sulianullu tassunga tunngasunut atortariaqarsimanerat. Erik Jensen (S) oqarpoq.
Taamaattumik qaammat kingulleq naalersoq Qaasuitsup kommunia nalunaarusiamik utertipput.
- Tusarniaanermut nalunaarusiat tamaasa utaqqeqqaartariaqarsimavagut, inaarutaasumik nalunaarusiunnginnitsinni.
Erik Jensenip (S) neriorsuutigaa tusarniaanermut akissutit isornartorsiuinerillu allat Kommune Kujallermeersut pingaaruteqarluinnarmata pimoorunneqassalutillu..
- Nalunaarusiaq naammasingajaliivippoq suliaqartullu ajornarsiummik aaqqiiniarnermi attaveqatiigittuarpugut. Naalakkersuisoq naqissusiivoq.