paragraf 37

Erik Jensen Demokraatinut akissuteqarusunngitsoq

Attaveqaqatigiinnermut Naalakkersuisoq, Erik Jensen, Demokraatit imaatigut kabelitaaq pillugu arlalinnik apeqquteqarsimasut akissuteqarfigerusunngilai. Apeqqutit uani takukkit.

Erik Jensen, Demokraatit Inatsisartuni ilaasortaatitaanut akissuteqarluni tunngavilersuutigaa katillugu apeqqutit 50-it sinneqarmata paasissutissanillu kissaateqartoqarluni.

- Paasinnittaasera tunngavingalugu apeqqutigineqartut Naalakkersuisunut apeqquteqarnerit suliarineqarnissaannut najoqqutassiarineqartut, Inatsisartut Suleriaasianni allassimasut, naammassineqarsimanngillat, Erik Jensen oqarpoq ilassutigaalu Naalakkersuisut siulittaasuannit Kim Kielsenimit taperserneqarluni.

Najoqqutassiami allassimavoq, "apeqqut naatsumik erseqqissumillu ilusilerneqassaaq aammalu tunngavilersuutitaqassalluni", Erik Jensen paasissutissiivoq.

Apeqqutillu akiumaneqanngitsut tamaasa Sermitsiaq.AG-p pissarsiarisimavai.

Ataani takusinnaavatit:

Naalakkersuisunut apeqqutit nalunaarasuartaateqarnermut tunngasut pillugit imaatigut kabeli ilanngullugu:

1. Naalakkersuisut nassuiarsinnaanerlugu sooq Tele Postip suliaminut ilaatittariaqarneraa suli uppernarsineqanngitsoq sakkortussuseq? Peqataanik iluaqutaassagaluarpoq assersuutinik nunani allaneersunik takutitsisoqarsinnaagaluarpat, ilumut imaatigut kabelip pisinnaassusaanik piginnittut naliginnaasumik niueruteqarnerminni ilanngullugu atortarneraat suli uppernarsineqanngitsoq sakkortussuseq.

2.§ 37 naapertorlugu apeqqummut nr. 227-mut akissutip immikkoortuani 1-mi ima allassimasoqarpoq: Aningaasaliinermi aningaasartuutit taamatullu atortunut assiliilluni signalinik allanngortiterissutinut ingerlatsinermut aningaasartuutit amerlammata, Tele Post taamaallaat aningaasaliivoq sukkassutsimut pisariaqartumut atuinerup ineriartorneranut ikorfiisussamut.
a. Naalakkersuisut Tele Postip siulersuinit ilisimatinneqartarnerlutik aalajangiisoqarsimatillugu aningaasaliinernik qaffasissumik aningaasartuutitalinnik kiisalu qaffasissunik ingerlatsinermut aningaasartuutitalinnik assersuutigalugu atortunut assiliilluni
signalinik allanngortiterussutinut?
b. Naalakkersuisut Tele Postimi siulersuisunit ilisimatinneqarsimassagaluarnerlutik Tele Post saaffigineqarsimasuuppat imaluunniit aningaasaliinissat pillugit oqaloqateqarsimasuuppat, aningaasaliissutissat qaffasissumik aningaasartuutitallit kiisalu qaffasissunik
angerlatsinermut aningaasartuutitallit pillugit?
c. Naalakkersuisut qanoq iliuuseqarnikuuppat Tele Postimi siulersuisut Naalakkersuisunut paasissutissanik tunniussaqanngitsoornissaasa pinngitsoortinnissaa qularnaarumallugu suliani suniluunniit aningaasaliinermut aningaasartuutinut kiisalu ingerlatsinermut aningaasartuutinut tunngasuni assersuutigalugu atortunut assiliilluni signalinik
allanngortiterissutinut?
d. Tele Postimi siulersuisunut qanoq kinguneqassava Naalakkersuisut paasissagaluarpassuk paasissutissanik tunniussinngitsoortoqarsimasoq aningaasaliinermi aningaasartuutinut qaffasissunut kiisalu ingerlatsinermut aningaasartuutinut qaffasissunut tunngasunik?

3. Qanoq naliliisoqartarpa aamma tunngaviit suut atorneqartarpat paasiniarlugu ilumut sunaluunniit atuinerup ineriartorneranut ikorfiisussatut pisariaqarnersoq takuuk issuaaneq apeqqut 2-miittoq?
a. Naalakkersuisut nassuiarsinnaanerlugu Tele Postsimi siulersuisut, Tele Postimi pisortat Naalakkersuisulluunniit naliliisussaatitaanersut paasiniarlugu atuinerup ineriartorneranut ikorfiisussatut suna pisariaqarnersoq.

4. Naalakkersuisiut uppernarsarpaat imaatigut kabelimi sakkortussuseq atorneqanngitsoortussaq annertussuseqarmat 99 %-nik. Taavalu imaatigut kabelimik pilersitsinermi aningaasartuutit qaffasissut aningaasaliissutillu eqqarsaatigissagaanni
Naalakkersuisut iluarisimaarnerlugu imaluunniit iluarisimaannginnerlugu, taamaallaat imaatigut kabelip sakkortussusaata 1 %-iinnaa atorneqassammat?
a. Naalakkersuisut isumaqassappata iluarisimaarnartoq taava qanoq iliorluni akileraartartut aningaasaataannik atuipilunneq innuttaasunut naapertuuttutut oqariartuutigineqarniarpa?
b. Naalakkersuisut isumaqarpata inuiaqatigiit aningaasaliinerat annertooq tunngavigalugu namminersorlutik oqartussat ingerlatseqatigiiffiata siuarsaasinnaannginnera iluarisimaarnanngitsoq, taava tamanna Tele Postip siulersuisuinut qanoq kinguneqassava?

5. Naalakkersuisut kissaatiginerlugu imatigut kabelip sakkortussusaanik atuineq allisinneqassasoq taava taamaassimappat Naalakkersuisut suut suliniutit aallartinniarpaat?

6. Imaatigut kabelip Greenland Connectip sallaatsumik oqaatigalugu sakkortussuseq alliniarlugu aallartinniaaluusaarsimanera eqqarsaatigalugu aningaasatigut kingunissai taamatullu aningaasaliinissaq kiisalu ingerlatsinermut aningaasartuutit eqqarsaatigalugit Naalakkersuisut qanoq eqqarsarpat, imaatigut kabelip qanganitsernissaa taamaasillunilu taarsernissaa eqqarsaatigalugu imaatigummi kabelit 25-t ingerlanerini pisoqalikkajummata?

7. § 37 tunngavigalugu apeqqutitsinni nr. 227-mi apeqqutitsinni 2-mi imatut aperivugut: sakkortussuseq procentinik qassinik ANNERTUSINEQARSINNAAVA avannamut kimmut programmi allineqartuuppat. Malugiuk avannamut kimmut programmi nammineq tamakkiisumik sakkortussutsimut naleqqiullugu kismi apeqqutigineqanngimmat, paarlattuanilli apeqqutigineqarmat
sakkortussutsip ataatsimoortup/tamakkiisup ilaatut.
a. Isumaqarpugut apeqqut naammattumik akineqanngitsoq taamaattumik kissaatigaarput
naammaginartumik akineqassasoq.

8. § 37 tunngavigalugu apeqqummi 227-mi apeqqutip 3-ani ima allassimavoq: Tele Postip nalunaarutigaa, Europap Amerika Avannarliullu akornanni imaatigut kabelip sakkortussusaanik nioqquteqarneq sunnerneqaqqasoq unammilleqatigiinnermik
sakkortuumik kabelerpassuaqarluni ingerlatsisorpassuaqarlunilu. Eqqumiikujuppoq Verdensbankimiit TeleGeographymut pisortatigoortut tusarfiit tamarmik tikkuarmassuk imaatigut kabelit amerliartupiloortut pissutaalluni nunarsuarmi tamarmi internetip atorneqarnerata siuariarujussuarsimanera, taamaattumik isumaqarnassagaluarpoq nunarsuaq tamakkerlugu paasissutissanik 99 %-t sinnerlugu aqqusaarneqartartut imaatigut kabelit niuerfinni naliginnaasuni iluaqutissartaqassagaluartut.

a. Naalakkersuisut aamma taamatut isumaqarnerlutik, niuerfik unammilleqatigiinnerujussuarmik sunnerneqaqqasoq kabelerpassuaqarluni ingerlatsisorpassuaqarlunilu.
b. Tele Postip taggiineri qulaani issuaaneqartut misissuinernik ilumoortunik tunngaveqarnerlutik? Misissuinerit ilumoortut pigineqarpata assut takorusukkaluarpagut.

9. § 37 tunngavigalugu apeqqummut nr. 227-mut akissummi pineqartumi tunngaviginerarneqarpoq imaatigut kabelinik ingerlatsineq tamatigut aningaasaliiffittut iluatsinneq ajortut. Aamma taamaappa Greenland Connect eqqarsaatigalugu? Aamma taava imaannerluni kukkusumik aningaasaliinerusoq immaqaluunniit imaappa kalaallit inuiaqatigiit aningaasaliisimanerat pingaarnerpaaq aqunneqartoq piukkunnaateqanngilluinnaqqissaartunit?
a. Tele Postip suut assersuutit allat tunngaviginerarpai oqaramik imaatigut kabelit
aningaasaliiffigissallugit iluatsittuaannarneq ajortut?
b. Aamma allaqqavoq Greenland Connect Europap kitaata USA-llu avammut kangiatungaani angallaffimmi pingaarnerpaamik unammillersinnaassuseqanngitsoq. Taamatut inerniliinermi paasissutissat eqqortut suut tunngavigineqarpat?
c. Tamakku saniatigut angallaviit Skandinaviap akornaniittut sualumillu Islandimi taamaanneraanerit pillugit paasissutissat eqqortut takorusuppagut.
d. Aningaasaliinerit aningaasatigut kingunissai pillugit naatsorsuinerit aamma takorusuppagut Islandimi taamatullu Newfoundlandimi piffissaq ungasinnerusoq isigalugu qilersorneqaataasumik attartornissamut suleqatigiit isumaqatigiissuteqarnissaannut taakku tunngaviummata.
e. Greenland Connectip sakkortussutsimik atorluaasinnaannginnera eqqarsaatigalugu Naalakkersuisut isumaqarnerlutik pisariaqarnersoq akileraartartullu soqutigisarineraat Tele Postip piffissaq ungasinnerusoq isigalugu Islandimiunut Newfoundlandimiunullu suleqatinut qilersorneqaataasumik attartornissamut isumaqatigiissuteqarnissaa -
isumaqatigiissuteqartuunani soorlu inuiaqatigiit ingerlatseqatigiiffiat immikkoortoq Greenland Connectimik piginnittoq?

10. § 37 tunngavigalugu apeqqummi 227-mi apeqqutip pingajuanni Tele Postip oqaatigaa piareersimallutik niuernikkut periarfissanik takkuttussanik islandimi paasissutissanik katersuiviit siuariartorlualissagaluarpata. Qanoq pisoqarnerani nalilerneqassava siuariartorluartoqalersoq Verne Globalip allarpassuarnut ilanngullugu BMW pisisartorimmagu Islandimi paasissutissanik katersuivik 18 hektarinik annertussusilik 2012-mi aallartimmalli?

11. § 37 tunngavigalugu apeqqummi 227-mi apeqqutip pingajuanni Tele Postip aamma oqaatigaa pisariaqartoq Tele Postip paasissutissanik ingerlatitseqqittarnermini akinik pissarsisariaqassasoq ingerlatseqatigiiffik iluanaaruteqarsinnaalersillugu akissaqartilerlugit aningaasaliissutissat pisariaqartut aamma ingerlatsinermut aningaasartuutit. Ingerlatseqatigiiffiup Imaatigut kabelimut aningaasaliissutini nalikilliliissutigereermagit taamaasillunilu Tele Post periarfissaarutereermat Return on Investmentimik (ROI)-mik pilersitsinissaminut taava qanoq ilillutik Naalakkersuisut takorloorsinnaavaat iluanaaruteqartoqarsinnaassasoq aamma Naalakkersuisut isumaqarpat Tele Postip imaatigut kabelip sakkortussusaa iluanaaruteqarfigisinnaassagaa, ullormi manna tikillugu imaatigut kabeli iluanaaruteqarfigisinnaasimanngimmassuk?
a. Tele Postip ulluni makkunani tusaqqusaarutigilluarpaa suleqatertillu islandimeersoq Verne akit APPARTISSINNAASIMALLUGIT 80-90 %-nik. Naalakkersuisut isumaqarnerlutik ilumoortoq killormut saatinniarneqartoq Tele Postimi § 37 tunngavigalugu
apeqqummut 227-mut akipput pisariaqartoq paasissutissanik ingerlatitseqqittarnermi akit ima qaffasitsigissasut ingerlatseqatigiiffik iluanaaruteqarsinnaanngorlugu? Taava sunamita pissutaava Tele Post tassanngaannaq akitigut unammillersinnaaleriataarneranut atlantiku ikaarlugu paasissutissanik ingerlatitseqqittarnermi akit eqqarsaatigalugit, oqaatigineqartummi akissutaareersumut
naleqqiullugu killormoorput?

12. Naalakkersuisut qanoq iliorlutik akileraartartut minnerunngitsumillu Inatsisartunut ilaasortat paasitinniarpaat nassuiaallugillu atuinerup killeqarluinnarneranik kiisalu imaatigut kabelip sakkortussusaanut iluanaarutit killeqarluinnartut pillugit?
a. Imaatigut kabelip sakkortussusaanik amingarluinnartumik atuineq nalunaarasuartaaseriveqarnerup unammillerfiunerulernissaata unitsikkallarneqarnissaanut siunnersuummut UKA2017/109-mut qanoq sunniuteqarnissaa naatsorsuutigineqarpa?

13. Naalakkersuisut Tele Postip Kalaallit Nunaanni qarasaasiakkut ineriartupiloorneraanera" ilisarisinnaavaat sualummik eqqarsaatigalugu imaatigut kabelip sakkortussusaanik mikilluinnaqqissaartumik atuisoqarnera?
a. Sukkut qanorlu nunani allani pisisartut imaatigut kabelip kalaallit nunaanni atuisuisuinut akornusiisinnaanera Naalakkersuisut takorloorpaat qarasaasiatigut ineriartupiloornersuup assigiinnarmagu sakkortussutsimik tamakkiisumik 1 %-iinnarmik
atuineq?

14. § 37 tunngavigalugu apeqqummi 227-mi apqqutit sisamaannut tunngatillugu Naalakkersuisut akipput periarfissat kingunerusussallu misissorneqarnissaat pisariaqartussaasoq imaatigut kabelikkut attaveqaateqarneq Tele Postip piginnittuuneranit avissaartinneqassagaluarpat. Naalakkersuisut kissaatiginerlugu taamatut misissuisoqarnissaa aamma taamaattoqassappat kiammita misissuineq ingerlatissavaa aamma qaqugumita naatsorsuutigineqarsinnaava tamatumap Inatsisartunut saqqummiunneqarnissaa aamma tamanna UKA2017/109-p suliarineqarnissaanut qanormita sunniuteqassasoq naatsorsuutigineqarpa?

15. § 37 tunngavigalugu apeqqummi 227-mi apqqutit sisamaat akillugu Naalakkersuisut allapput pissutsit allat atuuttut imaatigut kabelikkut attaveqaatit kisimik avissartinneqassasuuppata. Qanoq aamma sooq Naalakkersuisut isumaqarpat pissutsit
allaasut aamma unammilleqatigiinnerulernissamut siunnersuutip unitsikkallarnissaanut tamanna qanoq sunniuteqassava taamallaat imaatigut kabelip sakkortussusaa Tele Postip piginnittuuneranit avissaartinneqassagaluarpat?

16. Tele Post isumaqarpat Tele Post akorngutissaqanngitsumik atulersitsinissaminut aningaasaliinini taavalu imaatigut kabelip sakkortussusaanik atorneqanngitsumik nunarsuatta sinnerani atuisartunut nioqquteqarnissani Tele Postip aningaasarsissutigisinnaappagu, taava sunamitaavaana pissutaasoq ulloq manna tikillugu taamaaliortoqarsimannginneranut?

17. Takuuk § 37 naapertorlugu apeqqummi 227-mi apeqqutit tallimaat. Suna pissutaava Tele Postip innuttaasut inuussutissarsiortullu immikkoortillugit isertitaqaataasimanerannut kisitsisaateqannginneranut. Naliginnaannginnami sulliviit niuerfimminnik ilisimannittarnerat taamaasillutillu kikkunnut nioqquteqartarnerlutik?

18. Aningaasaliissutit qaffasinnerujussuat aamma ingerlatsinermi aningaasartuutit qaffasinnerujussuat, taakkulu aningaasaliissutit qaffasissorsuit nalikillineqartarnerat, atortut qanganitsernissaat taamaasillunilu taarsiinissaq minnerunngitsumillu imaatigut kabelip
sakkortussusaanik naliginnaasumik atuinikippallaarneq eqqarsaatigalugit, taava qanoq ililluni niuernikkut aningaasaliisimaneq pitsaanngitsoq inuiaqatigiinnut aningaasaliinerusinnaava pitsaasoq? Takorusupparput kikkunnut pitsaasuusimanersoq
aamma qanoq?

19. Naalakkersuisut akipput imaatigut kabelimik atuisunngornissaq pillugu Facebookimit saaffigineqarsimanatik. Naalakkersuisut Tele Post aperisimanerlugu saaffigineqarsimanersut imaluunniit Facebookip sinniisuinik oqaloqateqarsimanersut allanilluunniit Facebook sinnerlugu isumaqatigiinniartartunik. Taamaassimappat Tele Post qanormita akissuteqarsimava?
a. § 37 tunngavigalugu apeqqummi 227-mi apqqutit arfernannut tunngatillugu paasissutissanik Naalakkersuisut Tele Postiluunniit noqitsisimappata, taava tamanna Naalakkersuisunut imaluunniit Tele Postimut qanormita kinguneqassava?

20. § 37 tunngavigalugu apeqqummi 227-mi apeqqutip 6-anut Tele Post akissuteqarnermini oqaatigaa piumasaqaatit arlallit naammasisariaqartut nunarsuup sinnerani paasissutissanut katersivimmik pilersitsissagaanni ingerlatsissagaannilu. Naalakkersuisut aamma/imaluunniit Tele Post tamakku pillugit misissuisimanerit inernerinik peqarpata assorujussuaq
takorusukkaluarpagut. Pigineqanngippatali sakkortuumik innersuussutigissuarput sukkanerpaamik periarfissat tamakku pillugit arlaannaannulluunniit attuumassuteqanngitsut misissutinneqassasut.
a. Nalunaarasuartaasiveqarnerup iluani sulliviup kisermaassisup attaveqatigiinnermut tamarmiusumut piginnittuunera nunanut allamiunut paasissutissanik katersivinnik aningaasaleerusukkaluartunut akorngutaavoq kiisalu qulaani taaneqartut misissuinerit
ingerlanneqarallartillugit piumasarissavarput Naalakkersuisut siunnersuut UKA 2017/imm. 109 utertikkallassagaat, pisariaqarmat paasissutissanik naammattunik pissarseqqaarnissaq taama angitigisumik aalajangiisoqartinnagu.

Powered by Labrador CMS