Naalakkersuisut
Erik Jensen anngigisalik: Nuummiippunga
Kommunimi politikeri naalaakkersuisunngortussatut oqaatigineqarpoq. Kisianni naalakkersuisunngulernerluni nammineq oqaatigerusunngilaa
KNR-ip ullaap tungaani allaasereriigaatut, Erik Jensen Siumumeersoq Naalakkersuisunut ilaasortanngorsinnaavoq.
Tassami Martha Lund Olsenip (S) kommuninut, nunaqarfinnut, isorliunerusunut, attaveqarnermut ineqarnermullu naalakkersuisutut tunuartitaareernerata kingorna, ullumikkut nutaamik Naalakkersuisunut ilaasortaqalissaaq.
Anngigisalik
Qeqqata Kommuniani kommunalbestyrelsimit sulinngiffeqarnissamut qinnuteqarnerit uppernarsarsinnaaviuk?
- Taamatut aallaaserinnittoqarsimappat taamaassaaq. Kisianni allamik oqaaseqarpallaarsinnaanngilanga, Erik Jensen Sermitsiaq.AG-mut oqarpoq, taannalu Naalakkersuisut siulittaasuannut Kim Kielsenimut allanik paasissutissanik unnersuussivoq.
Taanna anngigisaqakujulluni 'ataatsimiigiarluni' Nuummiinnerarpoq.
Tunuliaqutaa
41-nik ukiulik Erik Jensen Sisimiuneersuuvoq, timersornermi assammik arsarnermi isikkammilu arsarnermi timersoqatigiiffimmi SAK-mi aallutaqartoq, Qaqortumi Niuernermik Ilinniarfimmi aningaasaqarnermut sammisumik ilinniagaqarpoq.
Taanna ulluinnarni Ini A/S-imi Sisimiuni controlleritut pisortatut atorfeqarpoq, Qeqqata Kommunianilu kommunalbestyrelsimut 438-nit taaguunneqarluni qinigaavoq.
2015-imi folketingimut qinersinermi Siumumit qinigassanngortippoq, tassanilu 1.348-nit taaguunneqarpoq, taakkulu taasinerit tamarmik 6,5 procenteraat.
Inuk aalajaatsoq
Erik Jensen ulluinnarni aalajaatsorujussuusoq parteeqataa, Malik Berthelsen oqaluttuarpoq.
- Koncertinut tunngatillugu aamma timersoqatigiiffitsinni SAK-mi qanimut suleqatigiinnikooqaagut. Suliumatuujuvoq, inoqatiminullu ikiuukkumatooq, Malik Berthelsen oqaluttuarpoq.
Sisimiunilu sunniuteqartorujussuuvoq, Malik Berthelsen erseqqissaavoq:
- Erik Jensen nammineq inuttut suliaqarnissani, aamma inuiaqatigiinni aalasoqarnissaanik suliniuteqartorujussuuvoq, taamaammallu inuiaqatigiinni sunniuteqartorujussuuvoq.
- Kommunalbestyrelsimit sulinngiffeqarnissani qinnutigisimagaa ilumoorpa?
- Tamanna oqaaseqarfigisinnaanngilara, Malik Berthelsen, Qeqqata Kommuniani borgmesterinngortussaq oqarpoq.