nersornaasiineq
Erik Bjerregaardimut nersornaat
Inatsisartut siulittaasuata Lars-Emil Johansenip saqqarmioq sisamanngornermi tunniuppaa
Inatsisartut Siulittaasoqarfiata Ilulissani Hotel Arcticimi pisortaq Erik Bjerregaard sølviusumik Nersornaaserpaa.
Najukkami inuiaqatigiit aallaavigalugit ukiorpassuarni inuussutissarsiummik ingerlataqarsimaneranut nersorinnissutitut, Inatsisartut ilisimatitsipput.
- Inatsisartut Siulittaasoqarfiata sølviusumik Nersornaaserpaatit ukiorpassuarni tunniusimallutit suliaqarsimanerit, pingaartumillu akunnittarfimmik immikkuullarilluinnartumik ingerlatsinerit, nunatsinni nunarsuullu sinnerani isigineqarnitsinnut assut kivitseqataasoq pissutigalugu, Lars-Emil Johansen oqalugiarnermini oqarpoq.
Siulittaasup aamma akunnittarfik neriniartarfeqarneralu ilinniagaqarfigissallugu inuusuttut aamma orniginartitarigaat oqaatigaa.
Atuaruk: Bjerregaard SIK’p pisortanut nersornaasiuttagaanik nersornaaserneqarpoq
Inunnik ukkataqarneq
- Ukiut ingerlaneranni inuit pitsaasumillu sullissinissaq qitiutillugit akunnittarfiup pitsaassusia qaffakkiartortissimavat. Aammalu sullissineq pimoorussinerlu tamanna nunatsinnit tamarmit pingaartumillu nunanit allanit tikerartut tikikkuminartippaat.
- Akunnittarfimmik taama iluatsilluartigisumik ingerlatsiniaraanni pitsaasumik aqutseriaaseqarnissaq pisariaqarpoq, ilanngullugu oqarpoq.
Allaaserisap ataani assit takukkit