Erfalasorput
Erfalasutsinnik sanasup qallunaat ajunngitsuliornerat tulluusimaarutigaa
Naleqarluarpoq kalaallit ullorsiorneranni ukiut tamaasa Danmarkip Erfalasorput amusalermagu, efalasutsinnik Erfalasorput sanasoq isumaqarpoq
– Tulluusimaarutigeqaara. Kalaallit Nunaat sinnerlugu.
Taamatut oqarpoq kalaaleq eqqumiitsuliortoq kulturimullu naalakkersuisuusimasoq Thue Christiansen, taassumalu 1979-imi Erfalasorput sanavaa.
Ulloq erfasup amuneqartarfia
Eqqumiitsuliortup maanna 76-inik ukiullip tulluusimaarneranut pissutaavoq, qallunaat naalakkersuisui aalajangernikuummata siunissami juunip 21-anni Danmarkimi nunanilu allani naalagaaffiup illuutai tamarmik kalaallit erfalasuannik erfalasulertassasut.
– Isumaqarpunga ajunngitsuliorneq tamanna pitsaasuusoq, tamannalu pingaaruteqarpoq, tassa amerlasuut qummut qiviartalissammata oqarlutillu sunaana erfalasoq, taamaasillunilu Kalaallit Nunaat ilisimaneqarnerulissaaq, Thue Christiansen marlunngormat Ilulissani Ritzaumut oqarpoq.
Kakkissarfimmut titartarpaa
Ullumikkut Thue Christiansenip erfalasoq nammineq sanaamisut isigiunnaarpaa, inuiannulli kalaallinut takussutissatut pingaarutilittut isigalugu.
– Aallaqqaammut Thuep erfalasuatut taaneqartarsimavoq, qujanartumilli taamaakkunnaarsimavoq. Titartarneqaqqaarnerani suli pigaara.
– Kakkissarfimmut tuschimik titartaqqaarsimavara, Thue Christiansen oqarpoq.
Sermersuaq
Eqqumiitsuliortoq naapertorlugu erfalasutta qalipaatai aappalaartoq qaqortorlu sermersuarmut Nunatsinnilu kangerluppassuarnut takussutissaapput.
Thue Christiansenip Erfalasorput sanagamiuk pasillerneqartarsimavoq arlaata erfalasuanik assiliisimasutut, maannali ajukkunnani takusinnaavaa kakkissarfimmut titartaqqaakkani nunarsuarmi sumi tamaani amuneqartalersoq.
Egå Roklub
– Ilaatigut pasillerneqarsimavunga Egå Roklubip erfalasua assilisimagiga, ilumoortumilli oqassaguma: Geometriimik ilusilersukkat kisermaassassarinngilaat, eqqumiitsuliortoq illarluni oqarpoq.
Kalaallit Nunaata erfalasuata amusalernerata saniatigut naalakkersuisut aamma aalajangersimapput Savalimmiut erfalasuat, Merkid, ullorsiornermi amuneqartalissasoq.
Tamanna siullermik pissaaq Savalimmiut juulip 29-anni inuiattut ullorsiorpata.