Matoqqatitsineq
Eqqumiitsumik matoqqatitsineq politiinit atorunnaarsinneqarpoq.
Aqqusineq Qinngorpumi matuneqarnikoq ammaqqinneqartoq, politiit paasissutissiipput. Matoqqatitsineq nalunaaqutap akunneri marluk sinnerlugit atuussimavoq.
Maannalu Qinngorpumi najugaqartut soraarunik angerlarsinnaalerput.
Facebook innersuussutigineqartoq
Matoqqatitsimanermut suna patsisaasimanersoq politiit sillimaniarnermut pisortaanerat paasissutisseerusunngilaq Facebookimilu allatarisimasartik innersuussutigiinnarpaa:
- Qinngutsinni (Nuummi) maannakkoqqissaaq politiit suliaqarput. Taamaattumik Musap nalaani politiit assersuinikuupput. Innuttaasunut navianartoqanngilaq, kisiannili politiit qinnuiginnipput assersuineq ataqqineqassasoq.
Politiit allagarsiussimasaat ilaatigut ima oqaaseqarfigineqarpoq:
Innuttaasunut navianartorsiortitsisoqanngippat sooq matoqqatinneqassava?, Bikki Eleonora Reimer aperivoq.
Akissuteqarfigineqanngilaq
Politiit Facebook aqqutigalugu nalunaarsimangaluarpataluunniit politiinit akineqarnissaq naatsorsuutigineqarsinnaanngitsoq erserpoq.
Nalunaaqutaq 15:20 politiit nutaamik ima paasissutissiipput:
- Aqqusineq Qinngorpumi matuneqarnikoq ammaqqinneqarpoq.
Najugaqarfimmik matoqqatitsisimaneq paatsuugassutigineqaqisoq atorunnaarsinneqarpoq.
Innuttaasut paatsuugasut
Sermitsiaq.AG-p innuttaasut oqaloqatigisimasai sooq najugaqarfimmik matoqqatitsisoqarsimanera paatsuugassutigaat, oqaloqatigineqartut ilai matoqqatinneqartumi najugaqartuupput.
Politiinut saaffiginnikkaluarneq iluaqutaasimanngilaq politiimmi sooq matoqqatitsisimanerlutik paasissutisseerusunngillat. Sillimaniarnermi pisortap ataatsimiinnini utoqqatsissutigaa, oqaatigivaalu innuttaasut tusagassiuuteqarfiillu Facebookimi saqqummiunneqarsimasunut innersuussuteqarfigalugit