nipilersorneq
Eqqumiitsuliortuvut Kodap tunilluarnerorusuppai
Koda, piginnittussaanermik pisinnaatitaaffinnik illersuisuusoq kalaallinik nipilersortartunik naapitsissamaalerpoq
Kodap Nunatsinnut aningaasaliissutaasa pitsaanerusumik atorneqarnissaat oqaluuserineqartussaavoq Kodap kalaallit nipilersortartut sisamanngornermi unnukkut ataatsimeeqatigilerpagit. Ilanngullugu oqaluuserineqassaaq nersornaatinik tunniussisarnerup Koda Awardsip siunissami allaanerusumik ingerlanneqartalersinnaanera.
Kodap siammarterinermut ilaasortanullu pisortartaa Anne Sophie Gersdorff Schrøder aamma ilaasortanut siunnersorti Vibeke Bøgelund sisamanngornermi Nuummut tikissapput Koda Awardsip sapaammi kulturip illorsuani Katuami pinissaa najuuffigiartorlugu.
- Kodap kissaatigaa aningaasaliissutigineqartartut ilaasortaminut kalaallinut
annertunerpaamik iluaqutigineqartarlutillu nuannaarutigineqartarnissaat -
aamma siunissami, taamaattumik Kodap pisortartaavisa
eqqarsaasersuuteqarfigisimavaat aningaasaliissutaasartut taakku qanoq
iliornikkut ilaasortanut iluaqutaatinneqalersinnaanersut, Koda nalunaarpoq.
Kodap nersornaataa Koda Awards sapaammi pissaaq. Tamanna periuseq ataaseq atorlugu nersornaat tunniunneqartarpoq.
- Kodap kalaallinut erinniortunut nersornaasiuttagaanut Kodap pilersaarutai
nutaat qanoq sunniuteqarumaarnersut ilaasortat ataatsimiisinneqarneranni
oqaluuserineqassapput, Koda nalunaarpoq.
Kodap ilaasortanik ataatsimiisitsinera sisamanngornermi unnukkut nalunaaqutaq 19.00 Hotel Hans Egedemi pissaaq.