Monday, June 19, 2017 - 04:44

Eqqumiitsuliortut Nuugaatsiaq tapersersorpaat

Bent B. Olesenip qalipagaq 'Flying Ideas' akitsorteruppaa.
Assi.: Bent B. Olesen
Inuit, suliffeqarfiit aamma eqqumiitsuliortut Nuugaatsiami eqqugaasunut katersuiniarput

Ilaqutariit ajunaarsimanissaat aarlerigineqarpoq, amerlasuut pigisatit annaavaat. Qaqugulu angerlarsinnaalissanersut nalunartorujussuuvoq.

Nuugaatsiami innuttaasut taamatut nalaataqarput.

Taamatullu nalaataqarnerup inuppassuit sunnerpai, taakkulu namminneq ikiuiniarput.

Eqqumiitsuliortoq Gukki Nuka Uummannameersoq assimik akitsorterussivoq, aningaasat eqqugaasunut tunniunneqassallutik.

- Uummannami alliartornikuullunga, sorlaqarfingalugumi, pisoqarnera avataaniik malinnaaffigiinarsinnaannginnakku arlaatigut ikiuiniarusuppunga, Facebookimi taama allappoq.

Aamma Bent B. Olesen Nuummeersoq assimik akitsorterussivoq. Tunngavilersuummik allataqanngilaq, kisianni iliuuserineqartoq nammineq oqariartuuteqarpoq.

Seekon Radio Qaqortoq  20.000 koruuninik tunniussivoq, tamatumalu saniartigut Kujataani katersuiniarnermik aallartitsivoq.

Tapiissuteqarusukkaanni Grønlandsbanken eqqugaasunut tunniussivissamik kontumik ammaavoq. Konto nr. 6471-1570134, BankNordik aamma taamatut kontomik ammaavoq, konto nr. 8120-3061822126.

Katersuiniarnernik nalunaarutigitikkusutannik nalunngisaqaruit, redaktion@sermitsiaq.ag allaffigiuk. 

Seneste nyheder / Nutaarsiassat kingulliit