kulturi
Eqqumiitsuliortut kulturisiortullu atugarisaannik miisissuineq
Misissuinermi siunertaavoq Kalaallit Nunaanni eqqumiitsuliortut kulturisiortullu pitsaanerusunik atugassaqartinneqalernissaat
Eqqumiitsuliortunut kulturisiortunullu atugassarititat pitsanngorsarniarlugit nipilersortartoq eskimologi-milu cand. mag. Juaaka Lyberth Kalaallit Nunaat tamakkerlugu misissuinermik aallartitsinialerpoq.
Misissuineq tunngaveqassaaq periarfissanik unammilligassanillu, eqqumiitsuliortut kulturisiortullu ulluinnarni atugarisaannik.
– Eqqumiitsuliorneq ataasiinnaanngilaq. Eqqumiitsuliortut tassaapput nipilersortartut, atuakkiortut, qiperuisartut, isiginnaartitsisartut allarpassuillu. Misissuinerup takutissavaa tamakkua atugassarisaat qanoq ittuunersut Juaaka Lyberth tusagassiorfinnut nalunaarutikkut allappoq.
Ineriartorneq
Taassuma erseqqissaerpaa misissuinerup takutissagaa Kalaallit Nunaanni eqqumiitsuliortutut inuuneq qanoq ittuunersoq.
– Ulluinnarni atugarisaat ilisimassallugu pingaaruteqarpoq. Unammilligassaat nalunaarsorneqassapput, qularutigiunnaarlugu ineriartornissaminnut suut amigaatigineraat, Juaaka Lyberth tikkuaavoq.
Taanna paasissutissiivoq eqqumiitsuliortut kulturisiortullu ukiup ingerlanerani saaffigineqarnissartik naatsorsuutigissagaat. Naatsorsuutigineqarpoq misissuineq aappaagu naammassineqarumaartoq.