Eqqumiitsuliortut kattuffissuanni siulersuisut nutaat

Eqqumiitsuliornikkut Pinngorartitsisut Ingerlatsisullu kattuffianni EPI-mi ilaasortaasut film.gl, Nipilersortartut Kattuffiat NN, Kalaallit Atuakkiortut KA, kiisalu isiginnaartitsinermik suliaqartut SILA, kissaateqarnerisigut immikkut ittumik ataatsimeersuaqqammerput.

Ulloq 11. december ataatsimeersuarnermi nipilersortartoq Inunnguaq Petrussen EPI-mi siulittaasunngorpoq.

- Kattuffissuullu suliariligassaai, aningaasatigullu ilaasortaminut eqqumiitsuliortunut agguaassisinnaalernissaanut suliap aallartisarnerani, EPI Naalakkersuisuniit eqqumiitsuliortuniillu tatiginartumik inissisimanissaa, patajaatsumik ataqatigiissumillu sullissisinnaanissaa qulakkeerumallugu nutarsartariaqarpoq, kattuffissuaq tusagassiuutinut nalunaarummi allappoq.

Immikkullu ittumik ataatsimeersuarnerup kingorna siulersuisunngortut akisussaaffimmik nutaamik EPI’p aningaasanut inatsimmi kissaatiginikuusaa malillugu sulissapput, kattuffiit ilaasortaasut tamakkiisut suleqataaffiannik.

- Februarimi 2018 siulersuisut nutaat eqqumiitsuliornikkut kulturitsinnullu periusissiamik siunissamilu suliassanullu pilersaarummik saqqummiussissapput., tusagassiuutinut nalunaarummi oqaatigineqarpoq.

Siulersuisut nutaat tassaapput:

• Inunnguaq Petrussen (Siulittaasoq)
• Markus E. Olsen (Siulittaasup tullia)
• Karsten A. Heilmann
• Eigil Petersen
• Naleraq Eugenius