pilluaritsi
Eqqumiitsuliortunut checkerujussuaq
Frimærkit immikkut tuniniakkat iluaqutigalugit eqqumiitsuliortut peqatigiiffiat Kimik 100.000 koruuninik pissarsivoq
Eqqumiitsuliortut peqatigiiffiat Kimik ukiut marluk qaangiuppata nalliuttorsiornissaminut iluaquserneqarpoq. Frimærk immikkut tuniniagaq ukiut pingajuat affaq tuniniarneqarmat isertinneqartut 100.000 koruunit ataasinngornermi tunniunneqarput.
Kimimmi siulittaasoq Buuti Pedersen tulluusimaaqaluni checkimik tigusisuuvoq frimærkenut pisortaq Allan Pertti Frandsen tunniussimmat.
- TELE-POST-imut nuanneqaaq Kalaallit Nunaanni kulturimik tapersersuisinnaaneq. Amerlaqaat qujanartumik frimærkimik immikkut ittumik taassuminnga 50 ørimik
saniatigut akiliilaarlutik allakkamik nassiussilernerminni piserusuttartut. Aamma
nunarsuatsinni tamarmi katersisartut frimærkip nalinganut tapiliussartalimmik pisinissaq nuannarinilerujussuuvoq, Allan Pertti Frandsen oqarpoq.
Kimik 2015-mi ukiunik 20-nngortorsiortussaavoq taamalu nalliuttorsiornissamut piareersaateqarluni.
- 2015-imi ukiunik 20-nngortorsiorluta nalliuttorsiornissatsinnut piareersarnissamut tunissut manna angeqisoq periarfissiivoq, taamanikkussamimi ilaatigut atuakkamik saqqummiiniarpugut, Buuti Pedersen oqarpoq.