assit takukkit
Eqqumiitsuliortoq saqqummeriartortoq nutaaq Nanortalimmi saqqummersitsissaaq
Nivikka Abelsenip saqqummersitsinerminik ammaanissaanut Nanortallip Katersugaasivia qaaqqusivoq
Nanortalimmiu 15-inik ukiulik Nivikka Abelsen Nanortallip Katersugaasiviani eqqumiitsuliaminik saqqummersitsissaaq, tamatumunngalu atatillugu saqqummersitsinerup maajip 10-anni ammarneqarnissaanut katersugaasivik qaaqqusivoq.
Nanortallip Katersugaasivia oqaluttuarpoq Nivikka Abelsen mikisuararsuullunili isumassarsiullaqqissuusimasoq, qalipaatinillu iliusilersuinermillu sulineq nuannarilluarsimagaa.
– Nivikkap eqqumiitsuliaasa ilisarnaatigaat qalipaatit sakkortuut atortaramigit, qalipaariaasaa sakkortullunilu sinnattuerpalaartuulluni, piviusut piviunngitsullu kissalaartumik misiginartumillu akulerutsillugit, katersugaasiviup pisortaa Lasse Meyer oqarpoq.
Assigiinngitsunit isumassarsiortarpoq
Nivikka Abelsen nammineq oqaluttuarpoq inuuneq nuannarilluinnartuullugu, qalipaatinillu toqqaanini pisartoq nukimmit pitsaasumit eqqarsaatinillu nuannersunit, amerlasuutigullu taartoq qaamasunngortikkusuttaramiuk.
Nivikka Abelsenip qalipakkani assigiinngitsunit isumassarsiffigisarpai; pinngortitami, inuinnaat aqqusernganni aammalu nipilersukkat, timersorneq qitinnerlu aqqutigalugit.
Eqqumiitsuliortoq inuusuttoq pissanganartoq
– Nivikka avatangiisiminik alapernaatsuuvoq misissorniartuullunilu, sianiutillu arlallit atorlugit eqqumiitsuliai assigiinngisitaartuupput nikerartunik samminnillutillu takutitsisut, tamannalu takussutissaavoq eqqumiitsuliortumut inuusuttumut pissanganartumut, ingerlatserusussusilimmut sammisassanillu nassaariullaqqissumut, tamakkualu aallaavigaat nuannersumik misigissuseqarnerit eqqumiitsuliortutullu nukittuumik piginnaasaqarneq, katersugaasiviup pisortaa nersualaarivoq.
Nivikka Abelsen ullumikkut 15-inik ukioqarpoq, taamaasillunilu inuusuttunnguulluni eqqumiitsuliornermik ingerlatsilerpoq. Nivikka ukioq manna aggustimi ISA-mi Indianamukassaaq, paarlaateqatigiinnikkut ilinniartuulluni. Neriuutigaa tassani isumassarsiorsinnaalluni, siunissamullu periarfissat attaveqarfiilu nassaarissallugit.
Nivikka Abelsenip eqqumiitsuliaasa ilai ataani takukkit