Eqqumiitsuliortoq nunatsinneersoq Filippinerini saqqummersitsisoq

Nikolai Kleist Burkal angalarujussuarsimasutut taaneqarsinnaavoq.

Filippinernimi innuttaasut 110 miollioniusut Kalaallit Nunaata innuttaanut naleqqillugit amerlanerunnguatsiarput.

- Nunat taakku amerluk assigiinngissuterujussuat ingasappoq, Nikolai Kleist Burkal oqarpoq.

- Aappaa kiappoq aappaalu qiianaqaluni. Aappaa inuppaassuaqarpoq aappaalu inissarujussuaqarluni, nunat assigiinngissutai sanilliuppai.

Takornartanit isumassarsisarpoq

Qaammat qiteqquppat imilersarissanik qalipakkani saqqummersissavai. Qalipakkanilu nunaminit ungasinnerujussuani nunarilikkaminillu isumassarsiaminit ilusilersorsimavai.

Nikolai Kleist Burkdal Filippernep illoqarfissua 2015-mi tikeraarpaa. Tikeraarnerminilu kitaamiut eqqumiitsulioriaasiat soqutigilersimavaa. Tikeraarnerinnaagaluaq nunasinermik kinguneqarpoq.

Eqqumiitsuliortoq kalaallimik danskimillu angajoqqaaqarpoq, tunuliaqutaminillu kinaassusilersorniarneqartarnini nuannarinngilaa. Eqqummiitsuliornissani tamatigoortumik siunertaralugu.

- Kinaassusera pinngortinneqarnitsinnik ujartussallugu soqutigineruara qanoq inunngorsimanermit. Eqqaasarami siulleq silarsuarmut tamarmut tulluunnerummat, Nikolai Kleist Burkal oqarpoq.

Qalipaaneq nipilersorneq aningaasaqarnerlu

"Moving Measured" (uuttortaaneq aalasoq aaqq.) kisimiilluni saqqummersitseqqaatigissavaa. Saqqummersitarlu decembarip 15-ni Manilami takuaniarneqarsinnaassalluni.

Nikolai Kleist Burdal qalipaaginnarneq ajorpoq. Sjællandimi Rytmisk Højskolemi aamma ilinniarnikuuvoq, aningaasanillu aqutsinermi ilinniarsimalluni Parisimilu atuarnini nanginnikuusimallugu.

Nipilersornikkut aningaasaqarnermullu ilisimasani qalipakkamini isumassarsiorfigisarnerarpai.

- Nipilersorneq misissuisuuvoq killissanillu qaangiisarluni. Aningaasaqarnerlu atorfissaqartinneqarluni. Qalipakkakka sannaqarnerup ilioriasaartarnerullu akornanniippoq, Nikolai Kleist Burkal oqarpoq.