Eqqumiitsulianik Saqqummersitsivimmik takorluugaqarneq ingerlariaqqittoq

Nunatta Eqqumiitsulianik Saqqummersitsivianik angisuumik, kusanartumik nutaaliaasumillu pilersitsinissamut pilersaarutit ukiuni qulini uninngareerlutik nutaamik pingaarutilimmillu ingerlariaqqilerput.

Nationalgalleriet
Illussanik titartaasartup tusaamasap Bjarke Ingelsip Nunatta Eqqumiitsulianik Saqqummersitsivissaa imatut isikkoqarnissaa takorloorpaa.

Nunatta Eqqumiitsulianik Saqqummersitsivianik aningaasaateqarfiup, Josef Motzfeldtip siulittaasuuffigisaata, ukiuni qulini uninngareerluni aningaasaateqarfinnit ataasinnguarmik aningaasaliiffigineqarsimanani nutaamik periusissamik aalajangiingajalerpoq.

Kisianni Nunatta Eqqumiitsulianik Saqqummersitsiviata piviusunngortinneqarnissaanut, pisut marluk aningaasaateqarfimmut neriuuteqalersitsipput.

- Nunatta Eqqumiitsulianik Saqqummersitsiviata sanaartorneqarnissaa aningaasalerniassagatsigu ukiorpassuarni aningaasaateqarfinnut qinnuteqartarpugut. Kalaallit Nunaanni pisortap suliniutip ingerlanneqarnissaanut akisussaasuunianngippata tapersersorusunngilaatigut, Josef Motzfeldt nassuiaavoq.

Periarfissarujussuaq
Taamaammat periarfissaq siulleq oktobarimi takkuppoq, tassani IA-meersut aalajangiiffissatut siunnersuutaa, tassa Namminersorlutik Oqartussat saqqummersitsiviup ingerlannissaanut siunnersuut amerlanerussuteqartunit taperserneqarpoq.

Atuaruk: Eqqumiitsulianik saqqummersitsiviliortoqassasoq IA siunnersuuteqartoq

Periarfissap aappaa tassaavoq, aningaasaateqarfik Per Bendiximit attaveqarfigineqarmat, taanna Nuummi illoqarfiup ineriartortinneqarnissaanut pilersaaruterujussuarmik, sapaatip-akunnerani kingullermik Kommuneqarfik Sermersuumit saqqummiunneqartumik ingerlatsisuuvoq. Tassani issittumi arsaattarfissuaq tusaamasamit Bjarke Ingelsimit titartarneqartoq saqqummiunneqarpoq, taannalu illoqarfiup ineriartortinneqarnissaanut ilaavoq.

Bjarke Ingelsip saqqummersitsivik titartagaraa
Kommunip inissiat nutaat assiliartalersornerani Eqqumiitsulianik Saqqummersitsivik nutaaq ilaavoq, taanna aamma Bjarke Ingelsimit titartagaavoq. Saqqummersitsivik naak titartakkanut takusassianut ilaagaluartoq pilersaarusiamut ilaannginnerarpaa.

- Aningaasaateqarfik borgmesterimit, illussanik titartaasartumit Bjarke Ingelsimit aamma suliniummik ingerlatsisumit Per Bendiximit Eqqumiitsulianik Saqqummersitsivimmik tiguserusullutik saaffigineqarnera tassunga nassuiaatissartaavoq, aningaasaateqarfiup siulittaasua Josef Motzfeldt oqarpoq.

Atuaruk: Nunatta eqqumiitsulianik katersugaasivissaata isikkussaa takuuk

- Kisianni siulersuisuni aalajangiitinnata suliniuterput tunniutiinnarsinnaanngilarput, tamannalu sapaatip-akunneri arlaqanngitsut qaangiuppata pissaaq, Josef Motzfeldt ilisimatitsivoq. Qaammatini kingullerni politikkikkut annertuumik soqutiginnittoqalernerata kingorna aningaasaateqafik nutaamik periusissiussasoq taassuma oqaatigaa.

Akisussaassuseqartumik tunniussineq
- Inunnut akisussaassuseqartunut suliniut tunniunneqarnissaa pingaaruteqarpoq. Pisoq uagutsinnut nutaajulluinnarpoq. Suliniutip aarlerinanngitsumik eqeersimaartuunissaa qulakkiissavarput, aningaasaateqarfimmi siulittaasoq nassuiaavoq.

Suliniummut aningaasaliisussarsiorneq nanginneqarnissaa Josef Motzfeldtip siulersuisuni ilaasortaaqatini nammineerluni innersuussutiginiarpaa, tassami suliniut Kalaallit Nunaanni pisortanit taperserneqarmat.

- Nunatta Eqqumiitsulianik Saqqummersitsivia Namminersorlutik Oqartussani aamma kommunimit tapiissutinit ingerlanneqarsinnaaneranut periarfissaqarsoraara. Kulturip illorsua Katuaq assigalugu, Josef Motzfeldt oqarpoq.

Aamma takuuk: Nunatta oqaluttuarisaanerani inissianut pilersaarut annerpaaq

Aningaasaateqarfik kingusinnerusukkut illoqarfiup ineriartortinneqarnissaanut suliniummut annertuummut siulersuisunit taperserneqarpat ilanngussinnaasoq, taanna ilisimatitsivoq.

- Uagutsinnut matu matuneqassanngitsoq Per Bendixip neriorsuutigaa, Josef Motzfeldt oqarpoq.

Powered by Labrador CMS