Eqqugaasimasut siunnersorneqarnissaannik IA kissaateqartoq

- I dag er der i den politiske debat på justitsområdet primært fokus på de indsatte i anstalterne, og knap så meget på ofrene.

Inuit Ataqatigiit Inatsisartunut oqaluuserisassatut siunnersuutaat taama allassimavoq. Taamaammat inuit peqqarniilliorfigineqarsimasut atugaannik pitsanngorsaaniarluni qanoq iliortoqartariaqarneranik eqqartuerusupput.

Aamma atuaruk: Persuttaasartunik katsorsaasarneq iluatsilluartoq

Ikiuineq annikitsoq

- Inuit sakkortuuliorfigineqarnerini eqqugaasut eqqartuussinermi sammineqartaqaat, eqqartuussinerilli naammassereeraangata unereeraangataluunniit annerusumik ikiorneqaratillu isiginiarneqarunnaartarput. Eqqugaasut aningaasatigut taarsiivigineqarsinnaapput taarsiivigineqarnissaminnilluunniit qinnuteqarsinnaallutik. Pinngitsaaliisoqarsimappat, ukiukitsunik kinguaassiutitigut atornerluisoqarsimappat sakkortuuliortoqarsimappalluunniit aningaasatigut taarsiissutaasut eqqugaasut tarnikkut ikiligaanerinut naapertuutikkajunngillat, Inuit Ataqatigiit oqarput.

Partii aaqqiissutaasinnaasunik siunnersuuteqarput, soorlu aaqqiagiinginnernik iluarsiiniarnerit, eqqugaasunut siunnersuinerit, kiisalu eqqugaasunut aningaasaateqarfimmik pilersitsineq.

Aamma atuaruk: Inuusuttorpassuit nakuuserlutillu pinngitsaaliisarput

Eqqugaasimasunut oqarasuaat

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisup akissuteqaataani erserpoq, oqarasuaat atorlugu pinerluffigineqarsimasunut siunnersuisarfimmik pilersitsinissamik Naalakkersuisut piareersaateqartut.

- Pinerluffigineqarsimasunut siunnersuisarfimmik pilersitsinissami pinerluffigineqarsimasut siunnersuisarfimmut saaffiginnissinnaanissaat siunertaavoq, siunnersuisarfillu tarnip pissusaanik ilisimasalimmik tapersersuilluni oqaloqateqarsinnaanermut, inatsisitigut ikiorneqarsinnaanermut, ajoqusernerup sillimmasiisarfinnut nalunaarutigisarneranut allanullu neqeroorsinnaaneq, Sara Olsvig paasissutissiivoq.

Periuseq innersuussutitalik

Ilanngullugu paasissutissiivoq, Naalakkersuisut ukiaq manna inatsisilerinerup iluani periusissatut suliniutissatullu pilersaarummik saqqummiiniarlutik pilersaaruteqarput. Periusissaq pinerluffigineqarsimasut annerusumik tapersersuiffigisarnissaannut innersuussutinik arlalinnik imaqarpoq. Innersuussutit pinerluffigineqarsimasut pisariaqartitaat pillugit ilisimasanik katersanik kiisalu pinerluffigineqarsimasut qanoq ilillugit tapersersuiffiginissaannut suliniutissanik assigiinngitsunik imaqarput.

- Ataatsimut isigissagaanni pinerluttuliornikkut pinerluffigineqarsimasut, oqartussaasunillu attaveqareerlutik qanoq misigisartik namminneq misigisarneraat iluamik ilisimasaqarfiginngilavut. Taamaammat tamanna misissuiffigissallugu paasiniaaffigissallugulu pisariaqarpoq, taamaaliornikkut pinerluffigineqarsimasut maluginiarneqarnerulissammata pisariaqartitaannillu neqeroorfigineqarniassammata. Misissuinermilu aamma misissuiffigisariaqarpoq suliamik ingerlatsisoqartillugu piffissap ilaani pinerluffigineqarsimasut allanut sanilliullugit immikkut tapersersorneqarnissamik pisariaqartitsisarnersut, Naalakkersuisut akissuteqaammi allapput.

Siunnersuut Inatsisartuni ulloq 8. november oqallisigineqassaaq.