Eqqartuussut: Kalaallip toqunerata kingorna angutit sisamat ukiuni 30-ni paarnaarussivimmi pineqaatissinneqassanngillat

Nunap eqqartuussisuuneqarfiata angutip 20-nik ukiullip, Kalaallit Nunaanneersup, Skagenimi persuttarneqarluni kapoorneqarlunilu toqutaanerata kingorna, sakkortuumik persuttaasoqarsimasutut eqqartuussivoq.

Angutit sisamat eqqartuussut nunap eqqartuussisuuneqarfianut eqqartuussummik ukioq ataaseq matuma siorna suliassanngortitsereernermik kingorna, siunissaat allatorluinnaq isikkoqalerpoq.

Angutit pingasut illoqarfiup eqqartuussivianit ukiuni aqqaneq-marlunni paarnaarussassanngorlugit pineqaatissinneqarput angullu sisamaat piffissami killiligaanngitsumi tigummigallagassanngortinneqarsimalluni.

Vestre Landsretilli eqqartuussut pingasunngormat sivikillorujussuarpaa. Pineqaatissinneqarsimasut ilaat ataaseq iperangaavoq, pingasullu sinneruttut sakkortuumik persuttaasimasutut peqataasimasutulluunniit pineqaatissinneqarlutik.

Pineqaatissinneqartut pingasut, ataaseq ukioq ataaseq qaammatillu pingasut, aappaa ukioq ataaseq qaammatillu arfinillit kingullerlu ukiuni marlunni paarnaarussivimmiittussanngorput.

Katillugit ukiuni 30-ini, ataaserlu tigummigassanngorlugu, illoqarfiup eqqartuussiviani pineqaatissiinerigaluaq maanna sivikinneerarsuanngorpoq.

Angerlarsimaffimmini toqusoq

Angut 20-nik ukiulik, Skagenimi inissiamini januaarimi 2017-imi sakkortuumik persuttarneqarlunilu kapoorneqareernermi kingorna toquvoq.

Pisup kingorna angutit sisamat tigusarineqarput, toqutsisimasutullu Hjørringip eqqartuussiviani eqqartuunneqarlutik. Vestre Landsretilli angutit sisamat toqutsisutut eqqartuutinngilai.

Aalajangiinerup uissuumminartup tunngavigaa, januaarip 16-iani 2017-imi pisut qanoq ingerlasimaneri pillugit nalorninartoqarmat.

Pisumimi marloriarluni persuttaasoqarsimavoq. Vestre Landsretip aalajangerpaa persuttaanermi siullermi, nalunaaqutaq unnukkut arfineq-pingasut qeqqata missaani pisumi, angutit pingasut peqataasimanerat uppernarsaatissaqartoq.

Qularnarporli angutit sisamat taakku akornanni kina angutip 20-nik ukiullip inissiaanut iseqqissimanersoq persuttaanermillu nangitsilluni.

Pissutigineqartoq

Suliap eqqartuussivimmi suliarineqarnerani unnerluussisussaatitaasup, persuttaanermut pissutaanerarpaa persuttagaasup unnerluunneqartut ilaat, Jonas Normann, taamani 19-inik ukioqartoq ketaminimik tunisimammagu.

Ketamin uumasunik ilisimajunnaartitsissutitut atorneqartarpoq.

Angutip inuusuttup iisartakkat iigamigit niumini nukillaarpoq. Unnerluussut naapertorlugu iisartakkanik tunniussisup pillarneqarujussuarnissaa tassani aalajangerneqarpoq.

Sulialli ingerlanerani Jonas Normannip toqusup pillarneqarnissaanik kissaateqarsimanini akerlilerpaa. Pineqaatissinneqarsimasunilu pineqartuni taanna kisiartaalluni, ukiuni aqqaneq-marlunni paarnaarussaaqqasussaagaluarluni, maanna iperagaavoq.

Taarseeqqusissut

Qaammatini arlalinni tigummigallagaasimanini pillugu taarsiisoqarnissaanik maanna piumasaqarniarpoq.

John Diget Jensen, 43-nik ukiulik, illoqarfiup eqqartuussivianit ulorianarluinnartutut nalilerneqarluni piffissami killiligaanngitsumi tigummigallagassanngortinneqaraluartoq, maanna ukiuni marlunni paarnaarunneqarpoq.

Mark Dorf Gregersen, 30-nik ukiulik, ukiumi ataatsimi qaammatinilu arfinilinni paarnaarunneqarpoq, kiisalu Mikkel Kruse Fuglsang, 29-nik ukiulik, ukioq ataaseq qaammatillu pingasut paarnaarussassanngortinneqarluni.

Powered by Labrador CMS