nunap eqqartuussisuuneqarfia
Eqqartuussisuuneqarfimmi eqqartuussineq: Toqutsineq toqungasulli timaanik ileqqorluttumik ikkatiginninneq
Ukioq kingulleq Ilulissani angut amiilaarnaqisumik toqunneqarpoq. Pinerluuteqarsimasulli aappaa massakkut Kalaallit Nunaanni Eqqartuussivimmi eqqartuunneqassaaq. Tassani pineqartup eqqartuussivimmi ukiuni arfineq marlunni isertitsivimmiitinneqartussanngortitaasimanini allanngortinneqarnissaa neriuutigaa.
Angummik toqutsineq piffissani ulloq 27. juli nal. 18.00 sisamanngornermilu 28. juli nal 12.10 akornani pisimasoq, allakkami unnerluussummi erserpoq, tassani angutit marluullutik angut 62-nik ukiullip najugaqarfiani Atersuit 42-mi Ilulissani toqutsisimanerangaapput.
Pinerlunneq filmiliarineqarsimasoq
Unnerluutigineqaroq, eqqartuussinermik suliassanngortitseqqissimasup, angutip 62-nik ukiullip ingamik sakkumillu inngingissumik niaquatigut anaalerneqarnerata nalaani kaammattorneqarnermigut filmilioqquneqarsimavoq.
Pinerluttut taakku marluullutik angutip 62-nik ukiullip toqunerata kingorna ledningimik qungasiatigut qilersoriarlugu kuuffimmut kussangarissumut nivinngarsimavaat, unnerluussummi allakkami atuarneqarsinnaavoq.
Paragraffit marluk
Pinerluttulerinermi inatsit paragraf 86, toqutsineq aamma pinerluttulerinermi inatsit paragraf 46 timimik toqungasumik assuarnartumik ikkatiginninneq Nunatta Eqqartuussisuuneqarfiani naliliiffigineqassapput. Paragraf kingulleq ilanngunneqarpoq, angutip 62-nik ukiullip toqunerata kingorna taakku marluullutik taanna ledningimik qilersoriarlugu kuuffimmut kussangarissumut nivinngarneqarsimanera ilimagineqarmat, allagaq unnerluussut taama oqaasertaqarpoq.
Qaasuitsup Eqqartuussiviani ulloq 13 marts pineqaatissiisoqarpoq, taamaattoq 39-nik ukiulik ukiuni arfineq marlunni isertitsivimmiittussatut pineqaatissinneqarsimasup pinngitsuutinneqarnissani piumasaqaatigalugu eqqartuussineq suliassanngorteqqippaa.