Eqqartuussissuserisumik misissuisitsinissap kinguartinneqarnera IA-mit pakatsissutigineqarpoq

Pituffimmi suliarinnittuussisarnerup sumulluunniit attuumassuteqanngitsumik misissuiffigineqarnissaa Inuit Ataqatigiinnit suli piumasarineqarpoq. Misissorneqarnissaali kinguartinneqarsimasoq Naalakkersuisunit pingasunngornermi nalunaarutigaa, tassanilu eqqartuussissuserisoq Ole Spiermannip misissuinissaa pissutaavoq.

Illuatungiliuttut tamanna nalunaarutigaat.

- Taamatut aalajangertoqarnera naammaginanngilaq. Naalakkersuisut aalajangiisinnaassusaat apeqquserneqaqqippoq. Aallaqqaataaniilli oqariartuuteqarpugut pisumut misissuisoq sumulluunniit attuumassuteqanngilluinnassasoq, siunnersuuterput malinneqarsimasuuppat uunga killittoqarsimanavianngikkaluarpoq, Inuit Ataqatigiinni siulittaasoq Sara Olsvig Sermitsiaq.AG-mut oqarpoq.

Misissorneqarpoq
Tamanna Naalakkersuisut siulittaasuata Kim Kielsenip pingasunngornermi ilisimatitsissutigaa. Misissuineq apriilip aallaqqaataanit ingerlanneqalersimasussaagaluartoq taamaasilluni kinguartinneqarpoq.

Kinguartitsinermut eqqartuussissuserisoq Ole Spiermann pissutaavoq.

Kinguaattoorneq pissuteqarpoq eqqartuussissuserisoq Ole Spiermann eqqartuussissuserisunut ileqquusut pillugit maleruaqqusat malillugit misissuinermik aallartinneqareersumik isumaginnissinnaanngitsutut nalilerneqarmat.

- Eqqartuussissuserisut misissuinissaannut suliamut attuumassuteqartut tamarmik tatiginninnissamik soqutiginninnerat aallaavigalugu apeqquserneqarpoq Ole Spiermann eqqartuussissuserisunut ileqquusut pillugit maleruaqqusat malillugit misissuinerup aalajangiiffigineqarnissaanut piukkunnaateqarnersoq, tassa misissuinermik aalajangiineq Advokatrådets Responsumudvalgimut, Advokatnævnimik taaneqartartumut saqqummiussinissamut, tamanna Kim Kielsenip nassuiaassutigaa.

Sulineq pitsaanerusariaqartoq
Tamanna Inuit Ataqatigiinnit naammagineqanngilaq.

- Misissuititsineq 700.000 koruunit 1.000.000 koruunillu akornanni akeqassaaq. Aningaasarpassuupput, tamannalu pitsaanerusumik suliarineqarsimasinnaagaluarpoq. Akisunerulissanersoq aamma apeqqutaaginnalerpoq, Sara Olsvig oqarpoq.

- Sumulluunniit attuumassuteqanngitsumik misssuisoqarnissaa suli partiimit piumasaqaatigaarput. Misissuisussarmi inniminniigaavoq aamma eqqarsarluannginnermik suliaalluni. Kukkunersiuinermut ataatsimiititaliap suliamut ilaatinneqarsimasussaagaluarput. Suliaq tamaat misissoqqissaarneqartariaqarpoq taamatut pisoqaqqinnginnissaa anguniarlugu, IA-mi siulittaasoq naqissusiivoq.

Pituffik pillugu misissuisitsineq sumulluunniit attuumassuteqanngitsuusoq Kim Kielsenip IA-mut arlaleriarluni erseqqissaatigisareerpaa.

Advokatrådets Responsumudvalgip Bruun & Hjejle aamma Namminersorlutik Oqartussat taperserpagit misissuineq piaartumik aallarteqqinneqassaaq, naatsorsuutigi- neqarlunilu 2015-imi juunip qaammataani naammassineqassasoq.