Eqqartuussisoqarfiit misissuiffigineqarnerat

Kalaallit Nunaanni inatsisitigut isumannaatsuuneq kivinneqarnissaminut pisariaqartitsivoq.

Eqqartuussissuserisut siunnersuisoqatigiivisa siorna novembarimi nalunaarusiaani pingaarnertut tamanna inerniliunneqarpoq.

Eqqartuussivinnut, politiinut aamma inissiisarfinnut tunngatillugu siunnersuisoqatigiit inatsisitigut isumannaatsuunerup nukittorsarneqarnissaanut arlalinnik inassuteqaateqarput.

Atuaruk: Eqqartuussiviit aalajangiisarneri kukkunertaqartut

Sara Olsvig aamma Søren Pape peqataassapput
Oqaatigineqartut maanna politikkikkut iliuuseqarfigineqassapput.

Aqqutaani tusarniaasoqassaaq, taanna Folketingimi inatsisinut ataatsimiititaliap aamma nunarput pillugu ataatsimiititaliap ataatsimoorlutik aaqqissuutissavaat.

Taakku ataatsimiititaliat marluk tassani suliaqartut pingaarutillit tamaasa ataatsimoortinnissaat iluatsissimavaat. Tusarniaaneq naalakkersuisunit akisussaasunit aallarnerneqassaaq, justitsminister Søren Pape Poulsen (K) aamma inatsisinut atuutsitsinermut naalakkersuisoq Sara Olsvig (IA).

Tamatuma saniatigut eqqartuussisoqarfiit, politiit aamma Pinerluttunik Isumaginnittoqarfik pisortanik peqataatitaqassapput. Advokatrådet aamma Institut for Menneskerettigheder inassuteqaatiminnik tapiiniarput.

Atuaruk: Finn Meinel illersuisuuninngorpoq

Nuna tamakkerlugu illersuisuuneq nukittorsaataavoq
Immikkoortumi ataatsimi pingaarutilimmik ineriartortoqalereerpoq. Qaammatip aallartinnerani illersuisuunertut atorfik inuttalerneqarpoq. Taassuma illersuisut nukittorsassavai.

Illersuisuuninngortoq Finn Meinel aamma tusarniaanermi peqataassaaq.

Kalaallit Nunaat pillugu ataatsimiititaliami siulittaasup tullia, Aaja Chemnitz Larsen (IA), tusarniaatitsinissamut suliniuteqartuuvoq.

Taanna inatsisinik atuutsitsinermut politikkikkut iliuusissamik pingasunngornermi tusarniaanermi saqqummiussassaminik piareersimavoq.

- Tunngaviatigut inatsisinik atuutsitsinermut systemeqarpugut inuiaqatigiinnut naleqqussakkamik. Tamanna atuutsiinnassavarput, taamaattorli inuiaat inatsisitigut illersugaanerannik nukittuumik, sullerissumik nutaaliaasumillu attassinissatsinni kiffartuussineq misissuataartuartariaqarparput, taanna tusagassiuutinut nalunaarummi allappoq.