Eqqartuussinissaq kinguartinneqarpoq - gummibådit aappassaat arsaarinnissutaavoq

Tigusarinninnerit siullit marluk pipput akerliuniat niisarnanik ungoorineq akornersormassuk. Niisarnat sissamit meterinik untritialunnguaannarik ungasissuseqarlutik avammut qimaaqqipput.

Ilaasortat allat marluk imaani tigusarineqarput. Tamatumunnga atatillugu gummibådi arsaarinnissutigineqarpoq. Tigusarineqartut sisamat tamarmik niisarnanut inatsimmik unioqqutitsisutut unnerluutigineqassapput, politiit paasissutissiipput.

Niisarnat ataatsimoortut sisamanngormat naammattoorneqarput Vágoy-milu nunaqarfeeqqami Bø-mi toqorarneqarlutik.

Akunnialunnguit qaangiuttut niisarnat ataatsimoortut allat illoqarfiit pingaarnersaata Thorshavnip avatinnguani takuneqarput. Tassani toqoraanermut atatillugu Sea Shepherdimi ilaasortaq ataaseq tigusarineqarpoq. Thorshavnimi niisarnat 130-t missaanniitut Vágoy-milu 100-t missaanniittut toqorarneqarput.

Ulluni pingasuni 7-t tigusarineqarput

Juulip 20-anni Sea Shepherdimi ilaasortat marluk tigusarineqarput.

Taakkua angallatinik niisarnanik ungoorisunik akornusersuipput. Tamatumunnga aamma atatillugu angallat arsaarinnissutigineqarpoq.

Pisimasumut tassunga atatillugu ullumi sisamanngornermi eqqartuussisoqartussaagaluarpoq. Politiilli misissuinertik naammassisimanngilaat.

Angallat arsaarinnissutigineqartoq suli politiit tigumiarpaat. Niisarnanik ungoorisoqaleraangat politiit sakkutuullu imarsiortut amerlasuut nakkutilliisarput. Umiarsuit alapernaarsuutit Triton aamma Knud Rasmussen ataasinngormat najuunnermissut sisamanngormat aamma najuussimapput.

Paul Watsonip qallunaat umiarsuaat nersualaarpai

Avatangiisinik illersuiniaqatigiit Sea Shepherdimeersut Savalimmiuni niisarniarniarneq umiarsuit arlallit atorlugit sakkortuumik akerliuniarfigaat. Umiatsuit ilaat, Sam Simon, ullumikkut Shetlandimiippoq. Tassunga taqussersoriartorpoq, Paul Watson, Sea Shepherdimik tunngaviliisoq, facebookimini oqarpoq.

Paul Watsonip ilanngullugu oqaatigaa Tritonip katamariani Brigette Bardot niisarnanut qanillitsaalisimagaa. Savalimmiuni oqartussaasut niisarnarniarnermut inatsit sakkortusisimavaat, taamaasilluni Sea Shepherdimit akornusersuisut ukiut marluk angullugit parnaarussaasinnaallutik.

Susassaqanngitsut tamarmik angallatinit niisarnanik ungoorisunit minnerpaamik sømilimik ataatsimik ingalassimassapput. Pisariaqarpat killissaq tamanna oqartussaasut annertusisissinnaavaat.

Nunami aamma inuit susassaqanngitsut qanillissanngillat. Inatsit unioqqutinneqarpat ajornerpaamik pisoqartillugu ukiut marluk parnaarussaasoqarsinnaavoq. Eqqartuussinissaq, tallimanngormat kinguartinneqartoq, niisarnanut inatsit nutaaq malillugu eqqartuussinerussaaq siulleq.