KNR
Eqqartorneqarnerlunneq KNR-ip siulittaasuanit uggorineqarpoq
KNR-ip radioqarfimmik ‘Voice of Greenland’-imik pisinera annertuumik isornartorsiorneqarpoq. KNR-ili siunissamut isigerusuppoq
- Soorunami uggornaraluarpoq aallartinniakkatsinnik pitsaanngitsumik oqallisiginninneq, kisianni maannakkut isumaqatigiippugut siunissamut isiginiarluta aamma sapinngisarput tamakkerlugu iliussaagut suliniutip iluatsinnissaanut.
KNR-imi siulersuisuni siulittaasoq Nukaraq Eugenius oqarpoq. KNR-ip radioqarfimmik 'Voice of Greenland'-imik pisisimanera pillugu siulersuisut ataasinngornermi ataatsimiinnerat pillugu oqaaseqarpoq. KNR-ip radioqarfimmik pisinera politikkerinit, tusagassiuutinit, oqallittartunit allaniillu isornartorsiorneqarpoq.
Nuummi radio aallakaatitsisartoq ‘Voice of Greenland’ KNR-imi Pilerisaarivimmi atorfilimmit Claus Nissenimit pigineqartoq KNR-imit pisiarineqarnera ullut arlaqanngitsut qaangiunneranni nalunaarutigineqarpoq. Radioqarfiup pisiarineqareernerani Claus Nissen Pilerisaarivimmi pisortatut atorfinitsinneqarpoq.
KNR-ip pilersaarutaa akuerineqarpoq
- Siulersuisut qangalili KNR-ip siunissamut iliuusissatut pilersaarutaa akuersissutigereerpaat aamma tassunga ilanngullugu radiukkut kanalimik nutaamik pilersitsinissaq, taanna Nunatsinni inuusuttunut sammisuussasoq taakkumi ullumikkut naammattumik sullinneqanngillat maannakkut radiukkut kanali atorneqartoq eqqarsaatigalugu, siulersuisuni siulittaasoq Nukaraq Eugenius oqarpoq.
Radiukkut kanali nuna tamakkerlugu internet aqqutigalugu naalaarneqarsinnaavoq imaluunniit smartphones atorlugit APP ineriartortinneqarsimasoq aqqutigalugu. KNR Namminersorlutik Oqartussanut qinnuteqaatigaa kanalip DVB-T båndimut ilanngutsinneqarsinnaanera pillugu, taanna tassaavoq fjernsynikkut radio aamma tv kanalit akeqanngitsut.
AG-mi sapaatip matumani saqqummersumi atuarneqarsinnaapput 'KNR sakkortuumik tatineqartoq' aamma 'KNR-ip pisortaata iliuusissaarulluni tusagassiorfiit saassuppai'. Aviisi ataani pisiariuk: