avatangiisit pinngortitarlu

Eqqaavissuit amerlasuut salinneqassapput

Eqqaavissuarnik saliinissamut aningaasat atorneqartussat Inatsisartut aningaasaqarnermut akileraartarnermullu ataatsimiititaliaata akueraat

Pinngortitamut avatangiisinullu naalakkersuisoq Kim Kielsen Siumut

Nunatsinni eqqaavissuit amerlasuut qanoq mingutitsitigisarnersut ilisimaneqanngilaq, inuillu peqqissusaannut qanoq aamma sunniisinnaanersoq ilisimaneqarnani.

Maannakkut katillugit 44,5 million koruunit ukunani eqqaavissuarnut atorneqartussat sinaakkusiunneqarput: Upernavik, Kangerlussuaq, Maniitsoq, Paamiut, Narsaq, Qaqortoq, Tasiilaq, Ittoqqortoormiit, Sisimiut, Nanortalik, Alluitsup Paa, Narsarsuaq, Aappilattoq, Qassiarsuk, Narsaq Kujalleq, Ilulissat, Aasiaat, Qasigiannguit aamma Qeqertarsuaq.

- Maannalu kommunit - taamatut aningaasaqarnikkut annertuumik ikiorserneqarlutik - eqqagassalerinerminni avatangiisinik malunnaatilimmik pisariaqartinneqartumillu pitsannguisinnaanissaat qilanaaraara, Avatangiisinut Pinngortitamullu Naalakkersuisoq Kim Kielsen oqarpoq.

- Suliffissaqartitsiniarneq annertusitinniarlugu suliniutit aamma avatangiisinik malunnaatilimmik pisariaqartinneqartumillu pitsannguinernik pilersitsiviunissaat uannut pingaaruteqartuaannarsimavoq, Kim Kielsen oqarpoq.

Naalakkersuisut inassuteqaataat tunngavigalugu suliffissaqartitsiniarnermik siuarsaanissamut, sanaartornermi iluarsaassinermilu suliassat immikkut ittut aallartinneqarnissannut aningaasaliissutit 174,2 mio. koruuninik ilaneqarnissat Inatsisartut Aningaasaqarnermut Akileraartarnermullu Ataatsimiititaliaata 2014-imi apriilimi akueraat.

Aningaasaliineq allanngortinneqartoq
Aningaasanit taakkunannga 44,5 mio. koruunit avatangiisinut suliassaqarfimmi suliniutinut immikkoortinneqarput – 12,5 mio. koruunit eqqaavissuarnik saliinissamut aamma 32. mio. koruunit anartarfilerinermi atortunut nutaanut.

- Immikkut ittumik aningaasaliinermi aningaasaqarnermut piffissamullu sinaakkusiussat iluanni anartarfilerinermut suliniutit aallaqqaammut pilersaarutigineqartut naammassisinnaanatigit kommunit peqatigalugit naliliivugut. Taamaattumik tamatumunnga taarsiullugu annertuumik eqqaavissuarnik saliinermik ingerlatsinissamut, anartarfilerinermut atortunut aningaasaliissutit allanngortinneqarnissaannik Naalakkersuisut Inatsisartut Aningaasaqarnermut Akileraartarnermullu Ataatsimiititaliaannut qinnuteqarput. Taamaattumik Inatsisartut Aningaasaqarnermut Akileraartarnermullu Ataatsimiititaliaat naliliinitsinnut tapersiisimammat, aammalu aningaasat tamatumunnga taarsiullugu nunatsinni eqqaavissuit amerlasuut salinneqarnerannut atorneqarnissaannik akuersimmat nuannaarutigeqaara, Avatangiisinut Pinngortitamullu Naalakkersuisoq Kim Kielsen tusagassiutinut nalunaarummi oqarpoq.

Powered by Labrador CMS