ulorianartut
Eqqaavinni aallaasit imassaat ulorianartut
Nuummi eqqaavilerisut aallaasit imassaat eqqaavinnut igiinnarneqartartut naammattoortarpaat. Tamanna allat inuunerannik peqqissusaannillu ulorianartorsiortitsisinnaavoq
Aallaasit imassai eqqaavinnut igiinnarneqarsimasut eqqaavilerisunit naammattoorneqartarput – tamanna Kangerlukasik Avannarlermi umiatsialivimmi igitassanut ilitsivinni takussaanerulluni. Juulip qulingani igitanut ilitsivinnik imaarsinermi aallaasit imassai aallarneqanngitsut 20-t sinnerlugit amerlatigisut nassaarineqarput.
Kommuneqarfik Sermsersooq tusagassiuutinut nalunaarummi taama allappoq.
Aallaasit imassaat eqqaavimmi ikuallanneqartussaniittut ajornartorsiuterujussuupput.
- Imassanik aallarneqanngitsunik igitsineq akisussaassuseqannginnermik takutitsineruvoq, tamannalu erloqinarpoq, Kommuneqarfik Sermersuumi ingerlatsinermut avatngiisinullu immikkoortortaqarfimmi ingerlatsisoq, Frank Rasmussen oqarpoq.
- Taakku ikuallaavimmut ilanngullutik iginneqarunik qaarsinnaapput ikuallaavimmillu aseruisinnaallutik! Taamaalilluni ikuallaavik atorsinnaajunnaarsissinnaallugu. Aamma imassat ikuallaavimmi sulisunik annertuumik ulorianartorsiortitsisinnaapput.
Illoqarfimmi sumiiffinni igitanik ikuallanneqartussanut ilitsivinnut imassat atorneqanngitsut iginneqaqqusaanngillat. Imassat atorneqanngitsut politiinut tunniunneqartussaapput.