Eqalussuaq pillugu paasisat kingulliit ilisimatuunit nuannaarutigineqarput

Københavns Universitetimi Biologisk Institutimi ilisimatuut eqalussuarnik paasisassarsiorput. Eqalussuimmi ilisimaneqarpallaanngillat. Tuluit Nunaata imartaata kitaata tungaani eqalussuarmik siumuisoqarpoq sapaatit akunneri arlaqanngitsut matuma siorna, tamanna pillugu Københavns Universitet tusagassiuutinut nalunaarutigineqarpoq.

Eqalussuit pillugit paasisat amerliartorput. Nunarsuatsinni eqalussuit neqitortunit annersaasa tullerigaat ilisimatuunit nalunaarutigineqarpoq.

Ilisimatuut eqalussuarnik paasisassarsiortut
Eqalussuit arlaqartut nalunaaquttanik ikkussuiffigineqarput 2012-mi, tassani malinnaaffigineqarnissaat anguniarlugu taamatut iliortoqarluni. Ikkunneqartut golfit arsaaraattut angitigipput. Eqalussuit qanoq ititigisumiittarnersut sumukartarneranillu nalunaarsuivoq.

Nalunaarsuinerit naammassippata nalunaaquttat ikkunneqartut nammineerlutik kaanngassapput qaammatit qulingiluat qaangiunneranni. Tassanngaannit satellitsikkut ilisimatuunut paasissutissanik nassiussissallutik.

- Januaarimi nuannersumik pisoqarpoq. Wildlife Computersimit nalunaarfigineqarpugut arnaq Cornwallimi aneertilluni nalunaaquttanik ikkussiffitsinnik nassaarpoq. Eqalussuarmut meterinik pingasunik angitigisumut ikkussiffiginikuusatta paasissutissanik naammattunik pissarsereerluni atortoq nammineerluni kaanngarpoq. Atortut taamaattut tigoqqinngisaannaraluarpagut, qaammataasakkummi pissarsiarisavut ilaannikkut naammanneq ajorput. Periarfissanik amerlasuunik ammaavoq, marinbiologi professorilu John Fleng Steffensen tusagassiuutinut nalunaarummi allappoq.

Paasissutissat amerlanerusut
Atortoq paasissutissanik amerlasuunik peqartoq Helsingørimukaanneqaqqammerpoq. Tassani ilisimatuunit misissorneqassaaq. Tassani ilisimaneqanngitsut assigiinngitsut paasiniarneqassapput.

Eqalussuit qanoq nerisassaminnik pisaqartarnersut, sukkatigisinnaanersoq aamma qanoq ititigisumiittarnersoq ilaatigut ilisimaneqanngilaq.