qinersineq
EPI: Eqqumiitsuliortut atugaat eqqumaffigigisigit
Eqqumiitsuliornikkut Pinngorartitsisut Ingerlatsisullu inatsisartunut qinigassanngortittussat maanna kaammattorpaat qineqqusaarnermi kulturimik eqqumiitsuliornermik suliaqartut atugaannik sammisaqaqqullugit
Inatsisartunut qinersinissaq aappassaannik suaarutigineqarpoq kulturi pillugu Inatsisartunut nassuiaat aamma eqqumiitsuliornermut kulturimullu 2014-miit 2017-mut periusissiaq saqqummiunneqanngitsut.
Taamaattumik eqqumiitsuliornermik kultulerilerinermillu aallutaqartunit Inatsisartunut qinersinissami qinigassanngortittussat kaammattorneqarput aallussisut atugaat qineqqusaarnermi eqqumaffigissagaat.
Kulturi eqqumiitsuliornerlu avissaartinneqartariaqarput
- Pisariaqarluinnalerpoq eqqumiitsuliortut atugaat malunnaatilimmik pitsanngorsaaffiginissaat, ingammillu inatsisiliornikkut, EPI-p siulittaasua, Leif Saandvig Immanuelsen, oqarpoq.
- Eqqumiitsuliornermut inatsisissap eqqumiitsulioriaatsit katersuuffigissavaat, soorlu, filmiliortarneq pillugu inatsit, Isiginnaaritsisarneq pillugu inatsit, atuakkiorneq pillugu inatsit, il. il., Leif Saandvig Immanuelsen oqarpoq.
Inatsisartunut 2013-imi marsimi qinersisoqanngitsiartoq kulturi pillugu inatsisartunut nassuiaat saqqummiunneqartussaanikuungaluarpoq. Maannalu aamma eqqumiitsuliornermut kulturimullu 2014-miit 2017-mut periusissiaq Inatsisartunut saqqummiunneqartussaanikuungaluarluni.
Kulturi pillugu Inatsisartuni kingullermik nassuiaasiortoqarpoq 2004-imi, EPI-ilu malillugu taamanili Namminersornerullutik Oqartussat aamma Namminersorlutiik Oqartussat pisortatigoortumik kulturi eqqumiitsuliornerlu pillugu politikkeqarnikuunngillat.