Hans Enoksenip Siumumit tunuarnera
Hans Enoksenip partiissaa taama ateqassaaq
Hans Enoksenip partiiliariniakkami atissaa saqqummiuppaa
Hans Enoksen atsiornernik katersilluni maanna aallartippoq nutaamik partiiliornissaq siunertaralugu. Partiip pingaarnertut samminiarpai aalisarneq, piniarneq, nunaqarfiit isorliunerusullu isumaqarami partiinit allanit tamakku missukutaasut.
Hans Enoksenip atsiornerit 964-it pisariaqartippai nutaamik partiiliorsinnaanissaminut. Partii nutaaq taaguserniarpaa Partii Naleraq.
- Neriuutigaarput qaammatit tulliit ingerlaneranni atsiornerit pisariaqartinneqartut pissarsiarisinnaassallugit tamannalu pereerpat pilersitsilluni ataatsimeersuarneq ingerlanneqarumaarpoq, Hans Enoksen Sermitsiaq.AG-mut oqarpoq.
Taanna sapaatip akunnerani kingullermi Siumumit anivoq misigisimavorlu partiiliornissaminut tapersersortissaqarluarluni.
- Partiimi siunnerfiit pingaarnerit tassaajumaarput, aalisarneq, piniarneq, nunalerineq, nunaqarfinni isorliunerusunilu atukkat illussaqarniarnikkut inunnillu isumaginninnikkut sullissineq, Hans Enoksen oqarpoq.
Erseqqissaatigaa partiip anguniagassai pilersitsilluni ataatsimeersuarnermi erseqqinnerusumik aalajangersorneqassasut.
Partii Naleraq
Partiip atertaassaa ullumikkut politikkikkut pissusiulersunit isumassarsiaavoq. Hans Enoksen isumaqarpoq nalerassaaleqisoqartoq.
- Politikkikkut ingerlatsinermi aalajangersimasumik naleraqarnissaq pisariaarpoq. Politikkikkut siunnerfik ilisimaaralugulu ilisarisinnaasariaqarparput, Hans Enoksen oqarpoq.
Taassuma ilanngullugu oqaatigaa suliniarnermini kisimiinnani.
- Siumumit aninerma kingorna tapersersuisorpassuarnit tutsiussorfigineqarpumnga. Maanna tassa illoqarfinni nunaqarfinnilu atsiornernik katersinerit aallartippagut, Hans Enoksen oqarpoq.