Hans Enoksen: Ingerlatseqatigiiffiit unioqqutitsillutik pisassiissutissat pissarsiatik utertissavaat

Naalakkersuisooqatigiilertut isumaqatigiissumminnik saqqummiussimmata Partii Naleqqap siulittaasuata Hans Enoksen-ip ingerlatseqatigiiffiit aalisarnermik ingerlataqartut pisuutippai unioqqutitsillutik pisassanik pissarsisimanerarlugit taamaammallu pisassat taakku utertinneqassasut.

Hans Enoksen: Ingerlatsiviit unioqqutitsillutik pisassaatigilersimasatik utertissavaat!

Jensine Berthelsen

arfininng 05. maa 2018 18:24

Annonse

Tusagassiortunik katersortitsinermi Hans Enoksen imatut oqarpoq: ”Inatsimmi tamarmik allaqqapput! Pisassanik anginerpaamik piginnissinnaatitaapput selskabit 33 %, sineriassortut 15 %.

Taava taakkua qulaateqqasorujussuugamikkit, inatsisit uniorlugit massakkut ingerlagatta, taakkuuku tunngavigalugit aaqqissuussiniartugut, killissanut taakkununnga qaangiisimasut killissanut ukununnga killitsinneqartariaqarput. Imaanngilluinnaqqissaarpoq aalisagartassannik tamanik arsaarneqassasut, kisiannili inatsimmi tunngavigineqartoq taanna malillugu ingerlatsisoqartariaqarpoq, soorlu uagut inatsisit ataanni tamatta inuugatta, malitassagut unioraangatsigit inissinneqartarpugut, taamaammat sippuisimallutik taakkuninnga pisassanik piginnittunngorsimasut utertitsisariaqarput!”

Unioqqutitsilluni ingerlatsisoqarneraanera aallaavigalugu Hans Enoksen apersorparput:

Pisassiissutit aalisarnermut inatsimmi ima aalajangersorneqarsimapput:

§ 15. Pisassiissutinit pigisat § 14, imm. 2 naapertorlugu aalisarnermut tunniunneqarsimasut taamaallaat pigisassatut qularnaveeqqutitulluunniit tunniunneqarsinnaapput.

Imm. 2. Imm. 1 malillugu tunniussinermut piumasaqaataavoq tunniussinerup naalakkersuisunit akuerineqarsimanissaa.

Imm. 3. Ingerlatseqatigiiffiit imaluunniit inuit ataasiakkaat pisassiissutinit pigisanik aalisariutit ilaannut immikkoortunut avataasiortunut pisassiissutigineqartunit pisiortornermikkut pisassiissutinit tamarmiusunit 33,3 %-ii qaangerlugit pigisaqalersinnaanngillat.

Imm. 4. Ingerlatseqatigiiffiit imaluunniit inuit ataasiakkaat pisassiissutinit pigisanik aalisariutit ilaannut immikkoortunut sinerissamut qanittumi aalisartunut pisassiissutigineqartunit pisiortornermikkut pisassiissutinit tamarmiusunit 15%-ii qaangerlugit pigisaqalersinnaanngillat.

(2011-mi 10%-miit 15%-mut allanngortinneqarpoq)Naalakkersuisooqatigiit isumaqatigiissutaanni aalisarnermut tunngatillugu ilaatigut uku anguniakkatut allassimapput:

”94. Aalisarnikkut inuussutissarsiorneq nunatta nappatigaa, taamaattumillu ineriartortittuarnissaa naleqqussartuarnissaalu pisariaqarluni. Taamaattumik aalisarneq pillugu inatsisissap, sivisuumik attanneqarsinnaasup, Naalakkersuisooqatigiit susassaqartullu nunatsinni naapeqatigiissutigineqarsinnaasumik suliaqassapput, inuiaqatigiinni annertunerpaamik iluaqusiisumik. Tamatumani ilanngullugu inuusuttut aalisartut periarfissaat pitsaanerulersinniarlugit sinaakkusersorneqassapput.

95. Nunatsinni aalisagartassat pisassiissutigineqartartut tamakkerlugit qaqinneqartarnissaat naalakkersuisooqatigiit anguniarpaat, allaffissornikkut sullissinermi pisariaqanngitsumik aporfiulersartut aaqqiivigineqarnissaat naalakkersuisooqatigiit sulissutigissavaat.’’

- Qanoq ililluni unioqqutitsilluni ingerlatsisoqarsinnaagami?

- Aalisartitseqatigiiffinnik pilersitseriarlutik imaluunniit allanut pulasaqattaarlutik annerpaamik piginnittunngornikuugamik!

- Ajornartorsiut qanoq annertutigiva?

- Massakkut uanga taanna kisitsisilerlugu oqaatigisinnaanngilara, kisianni nalunngiinnarparput tamatta aalisartitseqatigiiffinnut arlalinnut pulaartorlutik (ingerlatseqatigiiffiit) piginnittuunerat qaffasissorujussuarmik inissisimalernikuusoq.

- Sooruna taamatut ingerlatsitsisitsiinnartoqarsimasoq nalunagu unioqqutitsisoqarsimasoq?

- Inatsit paaluusaarlugu paaluusarlugu, kiisa maanga killippugut naapittoqarsinnaannginnami, taamaammat tassa inatsit naammassineqartariaqalerpoq, pisassat amerlanerpaanut siammarneqartariaqaramik.

- Ilisimasimagussiuk unioqqutitsisoqarsimasoq politikkikkut akisussaasuullusi ingerlatseqatigiiffiit politiinut nalunaarutiginissaat eqqarsaatiginikuuisiuk?

- Taakkua tassa, aamma periarfissaqareeramik, ilaatigut inatsimmi allaqqasoqarami ”toqqaannartumik toqqaannanngitsumik” taakku oqaatsit aamma aaqqitassaagamik.

- Taava tassa imaappa unioqqutitsinerusimanngitsoq iliornerat?

- Tassa annerpaamik piginnittussaatitaapput 33,3%-mik, kisianni piginneqatigiiffinnut allanullu pulaartoramik procenti qaffattorujussuugami. Tassa piginneqatigiiffiit allanut pulaternerannik taanna pissuteqarpoq, pisassat inunnit ataasiakkaanit, selskabinit ataasiakkaanit pigineqarneri qaffasissorujussuanngoqqavoq, taamaammallu inatsit allanngortittariaqarparput.

- Taava tassa imaannerluni inatsit sanngeequteqaannartoq taamaammallu unioqqutitsineraaneq eqqunngitsoq?

- Pisassat aamma qaqinneqarsinnaanngippata ukiuni arlalinni utertinneqartussaagaluarput.

- Qaqinneqanngitsoortartut utertinneqartannginnerat qanoq ajornartorsiutaatigigami?

- 7000 tonsit tungaanut soorlu sinerissamut ukiut tamaasa nuunneqartarpasittarput, sinerissami aalisartunut pisiaritillugit.

- Illit nammineq oqaravit ”unioqqutitsilluta ingerlavugut”, taava Naalakkersuisunit naluneqanngikkaluartoq unioqqutitsisoqartoq, taamaattorli ingerlatiinnarlugit, soormitaavaana taamaattoqartoq?

- Immaqaana misissugassarsi ilissi, allanit isumassanik pissarsiniarnasi, piviusut takulaarsigit!

- Ilami ilissi isumaqarnerarpusi unioqqutsitsilluni ingerlatsisoqartoq, illuatungaanilu inuusuttut aalisartunngorusuttut aalisarnermut pulaniarnissaat ajornartorujussuunerarlugu, taakku imminnut ataqatigiinngippasipput?

- Tassa ukiorpassuarni ileqquulersimasut atuuttuulersoortaramik, inatsisini allassimanngikkaluarlutik!

- Tassa aalisarnermut inatsit putoqarmat taamatut ingerlatsisoqarpoq?

- Suu!

- Taavami qanoq iliorlusi putut matussavisigit aammalu sorpiaat ilanngunneqartariaqarpat aalisarnermut inatsisissami?

- Aalisarnermut inatsit allanngortiterneqassaaq, tusarniutigineqassaaq kattuffinnut innuttaasunullu, tassanngaaniit Inatsisartunukartussaassagami, ullormiit ullormut allanngortitiinnarsinnaanngilarput, aamma soorunami inatsisit malitassagut malittussaagatsigit, Hans Enoksen (PN) akivoq, naalakkersuisooqatigiilertullu allannguutissatut pilersaarutaat sorpiaassanersut itisilerumanngilai.

inuiagatigiit politikki