Hans Enoksen illuatungiliuttunit isornartorsiorneqarpoq

Hans Enoksen Inatsisartuni sivikitsumik siulittaasooreerluni isornartorsiorneqalereerpoq.

Siunnersuutit danskisut nutserneqartarunnaarnissaanik eqqarsaataa illuatungiliuttunit sakkortuumik isornartorsiorneqarpoq.

- Siunnersuut pitsaanngilluinnarpoq. Politikkikkut kikkut tamarmik paasineqarsinnaatitaallutillu tusaaneqarsinnaatitaapput, Demokraatini siulittaasoq Randi Vestergaard Evaldsen oqarpoq.

Siunnersuut Inuit Ataqatigiinnit aamma tigulluarneqanngilaq.

- Kalaallit Nunaata, nunatta, nukiit tamaasa atorfissaqartippaa. Oqaatsit tunngavigalugit inuiaat avissaartuutsinneqarnerat unittariaqarpoq. Tamannarpiarlu Inatsisartut Siulittaasuata, nunatsinni qaffasinnerpaamik qinikkatut inissisimasup, siuttuuffigisariaqarpaa, IA-mi siulittaasoq Sara Olsvig tusagassiutinut nalunaarummi allappoq.

Kalaallit oqaasii Nunatsinni pisortatigoortumik oqaasiusut AG-mi oqaatigaa.

- Namminersorneq pillugu inatsimmi allassimavoq kalaallit oqaasii Kalaallit Nunaanni oqaatsini pingaarnersaasut. Ajoraluartumik pissutsit imaapput Inatsisartunut siunnersuut oqaluuserisassanut ilanngunneqarsinnaanani siunnersuut qallunaatuumut nutserneqarsimanngippat. Ilumoorsinnaanngillaq Inatsisartut taamatut atugassaqartinneqarnissaat. Tamanna Inatsisartuni partiit allat peqatigalugit qaqilerniarpara, Hans Enoksen AG aviisimut oqarpoq.

Taamatut oqariartornera Demokraatini siulittaasumit isornartorsiorneqarpoq.

- Siunnersuutaa assigiinngisitsineruvoq, politikkikkut suliaqartunut pitsaanngitsumik sunniuteqartussaq, oqarpoq.

Kalaallit Nunaat marlunnik oqaaseqarfiusoq nassuerutigineqarnissaa Suleqatigiisitsisunit Tillie Martinussenimit oqariartuutigineqarpoq.

- Oqallinneq pineqartoq aallartinneqartorlu innuttaasut 30 %-ii mattunneqartarput, kalaallisut oqalussinnaanngitsut, immikkoortinneqartarlutillu allaat nipeqartarluni kalaallisut oqalussinnaanngitsut kukkusuusut, pineqartunut aaqqiissutissanik ujartuisoqarani, neqerooruteqartoqarani pikkorissarnissamut aamma inuiaqatigiinnut akuulernissamut - nassuerutiginagulu ukioqqortusereerluni oqaatsinik ilinniarnissaq imaannaanngissinnaasoq aamma peqataalersitsinissamik oqaluttoqarani kiisalu uummafeqarfigineqaratik "ataatsimoorfiup" iluamik nassuiarneqarsimanngisaannartup avataaniittut, Tillie Martinussen naqissusiivoq.

Hans Enoksenip Inatsisartunut siulittaasutut taamatut ingerlatsiniarnera pissusissamisuunngitsuusoq illuatungiliuttunit isorineqaproq.

- Siunnersuut partiilersorneruvoq, Inatsisartuni siulittaasuunini atornerluppaa. Ilaasortat tamarmik assigiimmik sullittussaavai, Inatsisartunimi ilaasortaqarpoq kisimi danskisut oqaasilinnik, Randi V. Evaldsen oqarpoq.

Hans Enoksen Inatsisartut siulittaasussaattut IA taaseqataaffimmassuk tamanik peqataatsitsinissaanik naatsorsuuteqarfigalugu erseqqissumik oqaatigaat.

- Inatsisartulli siulittaasuata nuannareqqusaarluni avissaartuutitsillunilu pissusilersorani angusaqarfiulluartumik Inatsisartut suleriaasiinik eqaallisaanissamut oqalliseqataanissaa kaammattuutigiumavarput, Sara Olsvig oqarpoq.