aningaasaateqarfik
Hans Enoksen: Aningaasaliinermut aningaasaateqarfiliornissamik pilersaaruteqanngilaq
Inuussutissarsiornermut Naalakkersuisup Hans Enoksenip ataatsimut aningaasaliinermut aningaasaateqarfiliornissamik Danmark oqaloqatiginianngilaa. Sianiilliorneq, Demokraatit oqarput
Qallunaat-kalaallit aningaasaliinermut aningaasaateqarfiliornissaannik Naalakkersuisut pilersaaruteqanngillat. Taamatut Inuussutissariornermut Naalakkersuisoq Hans Enoksen Sermitsiamut akissummini allappoq. Taamaasilluni januaarip 19-ianni Folketingimi apeqqarissaarluni oqallinnermi ministeriunerup Lars Løkke Rasmussenip assak isaassaa tigujumanngilaa.
Hans Enoksenip tamatumunnga tunngavilersuutigaa aningaasaliissuteqarnissamut periarfissanik pitsanngoriarsimasunik peqareersoq, ilaatigullu taavaa Siuarsaanermut Aningaasaateqarfik, Vækstfonden, maanna kalaallit selskabiinut taarsigassarsisitsisinnaalersimasoq.
Pilersitsinissaq pilersaarutaanngilaq
Tamatuma saniatigut Den Europæiske Investeringsbankip (EIB) Kalaalllit Nunaanni sammisaqarfiit taarsigassarsisitsiffiusinnaasut annertusisimavai. Assersuutigalugu attaveqaatinik suliniutit saniatigut aningaaserivik aatsitassarsiornermik suliniutinut aamma taarsigassarsisitsisalersimavoq. Den Nordiske Investeringsbank (NIB) issittumut taarsigassarsiussinnaasanik 500 millioner euronik aningaasartalimmik pilersitsisimavoq issittumi aningaasaleerusunermut kajungersaataasinnaasumik, kiisalu sulissutigineqarpoq Eksport Kredit Fondenip kalaallit ingerlatsiviinut qularnaveeqqusiisinnaanissaa.
– Taamaattumik Naalakkersuisut naliliipput aningaasaliissuteqarnermut periarfissanik arlalinnik pitsaanerulersimasunik peqareersoq. Aningaasaliinermut aningaasaateqarfimmik nutaamik pilersitsinissamut Naalakkersuisut pilersaaruteqanngillat.
Demokraatinit paasiuminaatsinneqarpoq
Demokraatini Naalakkersuisut aalajangernerat paasisinnaanngilluinnarpaat, aalajangernerlu tamanna Justus Hansenip sianiilliornertut taavaa, tassami kikkut tamarmik nalunngimmassuk nunap avataanit aningaasaliisut atorfissaqartikkai.
– Paasisinnaanngilara aallarnisaataasumik ataatsimiinermik ingerlatsisoqarumanngimmat. Minissteriunerup assammik isaassinera oqaloqatigiinnissamut kajungersaataasussaagaluartoq. Taarsiullugu itigartitsisoqarpoq, taamaasillunilu nunap aningaasanik pilerneqarsinnaanissaralua annaaneqarpoq. Qularutissaanngilaq naalagaaffiup qularnaveeqqusiinera aningaasaliisunut pingaaruteqartorujussuussagaluartoq, Justus Hansen oqarpoq taassumalu suliassaq Inuussutissarsiornerrmut Ataatsimiititaliamut saqqummiunniarpaa.
Allaaserineqartoq aviisimi Sermitsiami sapaatip akunnerani matumani saqqummersumi tamakkiisumik atuarneqarsinnaavoq. Aviisi uani pisiariuk: