Wednesday, January 10, 2018 - 13:01

Ellen angerlarluni Sermersuumi pisortanngulerpoq

Ellen Christoffersen Nuummut angerlalerpoq, Kommuneqarfik Sermersuumilu Sulisoqarnermut Sullissivimmi pisortanngussalluni.
Assi.: Kommuneqarfik Sermersooq
Kommuneqarfik Sermersuup qaammatip tullianiik Ellen Christoffersen Sulisoqarnermut Sullissivimmi pisortatut atorfinitsippaa. Taanna 2011-imili Danmarkimi najugaqarpoq, administrationsbacheloritut ilinniarsimalluni, tassani sulisoqarneq immikkut sammisarisimallugu.

Ellen Christoffersen Kommuneqarfik Sermersuumik Sulisoqarnermut Sullissivimmi pisortatut atorfinitsinneqarpoq, immikkoortortaqarfik taanna siornatigut Sulisoqarnermut Immikkoortortamik Aningaasarsialerivittullu taaguuteqarsimagaluarpoq. Qaammatinilu siullerni pingasuni-sisamani immikkoortortaqarfimmi suliniutinik suliaqarallassalluni..

Pissutsit malinnaaffigigai
- Ilinniarninnut atatillugu Kalaallit Nunaanni pissutsit malinnaavigisimavakka suliassannullu isumasiorfissatut atorniartarsimallugit. Taamaamaallu immikkut allaaserisassara aallartilerakku Kommuneqarfik Sermersuumi suliffeqarfittut suleriaasissaq Sermersusq Ikaarlugu – Siunissaq ataatsimoorullugu, qimerloorsimavara pissanganartunik arlalinnik imaqarsorigakku, Ellen Christoffersen oqarpoq

- Kommuneqarfik Sermersooq maannakkut pissanganartumik ineriartorfimmiinnerani, kommunemi sulisut peqatigalugit nutarterinissamut periarfissat takusinnaavakka, kommunemut iluaqutaasinnaasut, taamaasillunilu aamma Kommuneqarfik Sermersuumi innuttaasunut iluaqutaasinnaallutik.

Kalaalimernit
Taanna Kalaallit Nunaannut uternissaminut qilanaarpoq, pinngortitarsuaq, ilaquttallu maqaasisat najoqqilernissaat, minnerunngitsumillu kalaalimernit ulluinnarsiutigileqqinnissaat.

Seneste nyheder / Nutaarsiassat kingulliit