Elitesportip futsali pingaartillugu iliuuseqarpoq
Elite Sport Greenland ukiuni tulliuttuni sisamani Kalaallit Nunaanni Isikkamik Arsaattartut Kattuffiat 3.2 mio. kr. illup iluani arsaattarneq ineritikkiartoqqinnissaanut aningaasaliiffigaa.
Piffissami kingullermi Kalaallit Nunaanni isikkamik arsaanneq ineriartupallannikuuvoq, nunanullu allanut unammisalernerni angusarissaarnikkut.
Ukiunilu sisamani tulliuttuni timersuutip nunani allat unammisartut nalimmassarfiginiarlugit aningaasaliiffigineqarpoq.
Elite Sport Greenland ukiuni tulliuttuni sisamani Kalaallit Nunaanni Isikkamik Arsaattartut kattuffiat 3.2 mio. kr. illup iluani arsaattarneq ineritikkiartoqqinnissaanut aningaasaliiffigaa.
Elite Sport Greenlandi aatsaat siullermeerluni kattuffimmik immikkut isumaqatigiissuteqarpoq. Timersuutinimi assigiinngitsuni timersortartut ataasiakkaat kisimik taperserneqartaraluarmata.
Atuaruk: Angutit futsalertartut UEFA-mi unammiuaarnermut peqataalersut
Elite Sport Greenlandip, Kalaallit Nunaanni Isikkamik Arsaattartut Kattuffianut isumaqatigiissut allannguutaavoq aatsaammi taama pisoqarpoq.
”ESG-p GBU-lu isumaqatigiissiornerat pikkorivissortunik - piginnaanilinnillu ineriartortitsinermut toraakkamik pingaartumik alloriarneruvoq, Elite Sport Greenlandip siulittaasua, Malik Hegelund Olsen tusagassiuutinut allappoq.
GBU ukiunut arlalinnut pilersaarusiorsimavoq piukkunnaatilinnillu pikkorivissortunut unammisartunullu ineriartortitsinissamik.
GBU-kkut eqqissisimasumik toqqissisimanartumillu, siunissami anguniakkaminnik pilersitsiniarnerminnillu toraartaqarlutik, ingerlanissaat periarfissinneqarpoq.
- Isumaqatigiissutip piviusunngortinneratigut ukiunut arlalinnut nunatsinni nunanut allanut unammisartut piukkunnaatilinnillu ineriartortitsinissat pilersaarusiorsinnaanngorpagut, GBU-p siulittaasua, john Thorsen oqarpoq.
- Pingaarpoq pikkorivissortumik timersorneq ineriartortuassammat, timersornikkullu nunat assigiinngitsut akornganni qaffasissumik inissisimalernissaq anguniarneqarmat. Taamaattumik nuannaaqaagut suleqatigiinnissatsinnut nunatsinnilu pikkorivissortumik timersorneq nukittorsarneqassammat, Malik Hegelund Olsen oqarpoq.
Isumaqatigiissummi pingaarnertut inissisimavoq, ilinniarneq ineriartornermut aqqutissiuisuussasoq, taamaattumik sungiusaasunik pikkorissaanerit siunissami ingerlanneqartassapput. Tullinnguullugulu piginnaanillik amerlanerit ineriartortinneqassapput. Tamanna anguniarlugu isikkamik arsaattartut piginnaanillit katerisimaartassapput, taamaalionikkut nuna tamakkerlugu piginnaanillik attatiinnarneqassammata.
- Suliarpassuagut ineriartortissinnaanngorpagut, taassumallu malitsigisaanik UEFA-mut FIFA-mullu ilaasortanngornissaq aqqutissiunneqarpoq, GBU-p siulittaasua John Thorsen oqarpoq.