Elite Sport Greenlandip piumasani sukappai

Aningaasat Elite Sport Greenlandip agguaattagai pissarseqataaffiginiaraanni ukiunut arlalinnut siumut iliuusissatut periusissatullu pilersaarutit pisariaqarput. Oqaaseqaat tamanna saqqummiuneqarpoq Elite Sport Greenlandip siunissamut pilersaarutit pillugit sapaatip akunnerata naanerani isumasioqatigiissitsereernerani. Maanna oqallinneq kattuffiit peqatigalugit ingerlaqqissaaq.

Elite Sport Greenland timersortartunut pikkorinnernut aningaasaliisartuuvoq. Maanna siunissamut periusissaq suliniaqatigiiffiup ilusilersorlugu aallarteruttorpaa. Ilaatigut isummerfigineqassaaq timersuutit ikinnerit tapiiffigineqartalissanersut kalaallit timersortartut amerlanerit VM-mut OL-mullu anngunnissaat qulakkaarniarlugu.

Pilersaarutit sukumiisut
Aalajangernissarli kattuffiit sunniuteqaqataaffigissavaat. Aammali pisariaqarpoq kattuffiit imminnut qiviarlutik pikkorinnernut sullissinerup pitsanngoriaatigisinnaasaanik misissuataarinissaat.

- Takusinnaasarput malillugu Elite Sport Greenlandip kattuffiillu akornanni suleqatigiinneq nukittorsartariaqarpoq. Kattuffiit annertunerusumik aningaasaliiffigineqassagunik sukumiisumik ukiunut arlalinnut periusissanut iliuusissanullu pilersaarusiortariaqarput, Elite Sport Greenlandimi siulersuisut siulittaasuat Finn Meinel nalunaarpoq.

Pilersaarusiorluni isumasioqatigiinneq sapaatip akunnerata naanerani pivoq ilaatigut Team Danmarkimi pisortaq Michael Andersen tikeraartoralugu aammalu nunatsinni kattuffiit peqataasoralugit-

Island Gamesimut peqataasut ikinnerit?
- Kattuffiit ilimagisinnaavaat tapiissutit tunniunniarneranni Elite Sport Greenland maannamit akuunerulissasoq ilaatigullu aalajangiinermi sunniuteqaqataanissaq piumasarisassallugu. Sorpasuupput oqaluuserineqarlunillu nalilersugassat, Finn Meinel oqarpoq.

Elite Sport Greenlandip aamma oqaluuseritikkusuppaa kalaallit Island Gamesimut peqataajuaannassanersut imaluunniit timersuutit aalajangersimasut kisimik tassani peqataasassanersut. Pikkorinnerit tapersersorneqarnerat pillugu oqallinneq kattuffiit timersortartullu peqatigalugit oqaluusereqqinneqassaaq. Pilersaarutaavoq siunissamut Elite Sport Greenlandip pilersaarutaa ukioq naatinnagu suliarineqareersimassasoq.