elektronik
Elgiganten Ilulissani ammassaaq
Tamanna peqatigalugu Pisiffiup avannaani illoqarfimmi tassani Torrak Fashion pilerseqqippaa
Sisamanngormat Elgiganten Ilulissani ammassaaq.
Elgiganten nutaaq Ilulissani Pisiffiup allissutaaniissaaq, sapaatillu akunnerini kingullerni Elgigantenimi sulisut illoqarfimmi pisiniarfittaassaq piareersarpaat. Maannakkorpiaq nioqqutissat nioqqutissanut ilioraavinnut iliorarneqaleruttorput, ullormilu ammaanersiornermi Elkjøp Nordic-imit, Elgigantenimik piginnittumit, aallartitaq najuutissaaq.
Taamatut Pisiffik tusagassiorfinnut nalunaarutikkut allappoq.
Nioqqutissaatit amerlanerusut
– Ilulissani Elgiganten ammarneratigut najoqqutassaq misiligarluarneqarsimasoq atussavarput, tamannalu peqatigalugu nuannaarutigaarput nioqqutissaatit amerlanerusut neqeroorutigisinnaagatsigit illoqarfimmi innuttaasunut iluaqutaasumik, Pisiffiup pisortaanera Per Steen Larsen tusagassiorfinnut nalunaarummi oqarpoq.
Allanngortiterineq
Elgigantenip ammarnissaanik piareersaaneq ilutigalugu pisiniarfiutileqatigiiffiup Pisiffiup pisiniarfissua annikinnerusumik allanngortitersimavaa.
Tassami Torrak Fashion pilerseqqinneqassaaq aammalu ´Pisattat atortussaatit´-nut immikkoortoqarfik angisooq ammarneqassalluni. Aamma pisiniarfissuup nerisassaarniarfia nutarterneqarsimavoq, pisiniarfiutileqatigiiffissuaq paasissutissiivoq.