tillinniarneq
Elekronikkinik tillinniarnerujussuup kingorna akissarsiassaqartitsisut
Nuummi Nota Benemi hunnoruju tusintilikkaat arlaqartut nalinginut tillinniartoqarpoq. Pisiniarfimmik piginnittut politiinut nalunaartunut akissarsiassaqartitsipput
Sisamanngornerup unnuaani elekronikkinik niuerniarfimmi Nuummi Nota Benemi tillinniartoqarpoq.
Politiit naatsorsuutigaat, tillinniat piffissami kingullermi pisiniarfimmut arlaleriarlutik isertarsimasut, tassanilu mobiltelefonerpassuarnik, ipadsinik assigisaanillu tillipput.
Tillitanik pisineq sianigisiuk!
Pisiniarfiup aamma politiit naatsorsorpaat, elektronikkinik hunnoruju tusintilikkaanik arlalinnik naleqartunik tillittoqarsimassasoq. Ilaatigut Samsung Galaxy S7-inik aamma Iphone 6S-inik mobilitelefonerpassuarnik tillittoqarpoq.
Taamaattumik politiit ilimagaat, taakku elektronikkit tillitat nutaat aamma atorneqanngitsut maannakkorpiaq Nuummi tuniniarneqartut tunniussorneqartulluunniit.
Atuaruk: Hashimik niueruteqarneq millioneerinik nutaanik pilersitsiortorpoq
- Soorunalimi tillinneq unioqqutitsineruvoq, kisianni aamma tillitanik pisineq imaluunniit tuniniaaneq aamma unioqqutitsineruvoq, Brian Thomsen, Sermersuumi Politiini politikommisæriugallartoq oqarpoq.
Politiit oqarfigikkit
- Taamaattumik Nuummi innuttaasut, mobilimik nutaamik, tabletimik assingusumilluunniit inummit neqeroorfigineqarunik mianersoqqissaarnissaat aamma minnerpaamik pisiap allagartavianik takujumaqqaartarnissaat kajumissaatigissavarput.
Innuttaasunik Nota Benemut tillinniarnernut, tillitanut imaluunniit tillitaasinnaasunik tuniniaanermut ilisimannittoqaruni, politiit oqarasuaat 70 14 48-mut attavigeqqupput.
Akissarsiassaqartitsisut
Politiillu ikiornissaannut pissutissaqarluarpoq. Nota Benemi politiinut paasissutissanik suliamut naammassinninnermut aalajangiisunik aamma pisuusut tigusarineqarnerannut tunniussisumut 5.000 koruuninik akissarsiassaqartitsivoq.